mere baad

koī bhī aa.egā turbat pe bhalā mere baad

ḳhaak aa aa ke uḌā.egī sabā mere baad

jiite jī qadr kisī ne bhī na jaanī afsos

yaad meñ ro.egā phir kaun bhalā mere baad

sab ye muñh dekhe kī bāteñ haiñ kahāñ kī ulfat

yaad karne ke nahīñ ahl-e-jafā mere baad

qaum ne qadr na kī rah ga.ī hasrat dil meñ

merī turbat se ye aa.egī sadā mere baad

fātiha paḌhne ko aaya to bahut ro ro kar

baḳhsh de us ko ḳhudā us ne kahā mere baad

zindagī meñ to sila maiñ ne na paayā hargiz

kaam sab mere hoñ maqbūl-e-ḳhudā mere baad

ye vasiyyat hai ki jis ko hai mohabbat mujh se

phuul turbat pe chaḌhā jaa.e zarā mere baad

pūchhtī tum se hayā hai ye batā do mujh ko

ab nahīñ aate ho phir aaoge kyā mere baad

koi bhi aaega turbat pe bhala mere baad

KHak aa aa ke uDaegi saba mere baad

jite ji qadr kisi ne bhi na jaani afsos

yaad mein roega phir kaun bhala mere baad

sab ye munh dekhe ki baaten hain kahan ki ulfat

yaad karne ke nahin ahl-e-jafa mere baad

qaum ne qadr na ki rah gai hasrat dil mein

meri turbat se ye aaegi sada mere baad

fatiha paDhne ko aaya to bahut ro ro kar

baKHsh de us ko KHuda us ne kaha mere baad

zindagi mein to sila main ne na paya hargiz

kaam sab mere hon maqbul-e-KHuda mere baad

ye wasiyyat hai ki jis ko hai mohabbat mujh se

phul turbat pe chaDha jae zara mere baad

puchhti tum se haya hai ye bata do mujh ko

ab nahin aate ho phir aaoge kya mere baad