mere bhi kuchh KHwab

mere bhī kuchh ḳhvāb haiñ

jin ko maiñ jazboñ kā ḳhuun de kar paal rahī huuñ

kyā tumheñ koī e'tirāz hai

ujle dinoñ aur chāñdnī chamaktī rātoñ kī aas mujhe purvā kī tarah

kahāñ kahāñ nahīñ liye phirtī

mere ḳhvāb

shīshe kī tarah ḳhūbsūrat aur nāzuk inheñ mat chhuo

ki haath lagne se maile na ho jaa.eñ

bas tum duur se is kī ḳhushbū chakhte raho

magar mujhe ḳhvāb dekhne do

in sajīle aur pyāre ḳhvāboñ ke liye chāhe mujhe pāniyoñ se guzarnā paḌe

thaloñ kī masāfateñ hoñ

ḳhvāb mere saath raheñge

maiñ un ke liye hañsūñgī

gā.ūñgī nāchūñgī jiyūñgī aur mar jā.ūñgī

ḳhvāb phir bhī mere hī raheñge

mere bhi kuchh KHwab hain

jin ko main jazbon ka KHun de kar pal rahi hun

kya tumhein koi e'tiraaz hai

ujle dinon aur chandni chamakti raaton ki aas mujhe purwa ki tarah

kahan kahan nahin liye phirti

mere KHwab

shishe ki tarah KHubsurat aur nazuk inhen mat chhuo

ki hath lagne se maile na ho jaen

bas tum dur se is ki KHushbu chakhte raho

magar mujhe KHwab dekhne do

in sajile aur pyare KHwabon ke liye chahe mujhe paniyon se guzarna paDe

thalon ki masafaten hon

KHwab mere sath rahenge

main un ke liye hansungi

gaungi nachungi jiyungi aur mar jaungi

KHwab phir bhi mere hi rahenge