mere git tumhaare hain

ab tak mere gītoñ meñ ummīd bhī thī paspā.ī bhī

maut ke qadmoñ kī aahaT bhī jīvan kī añgḌā.ī bhī

mustaqbil kī kirneñ bhī thiiñ haal kī bojhal zulmat bhī

tūfānoñ kā shor bhī thā aur ḳhvāboñ kī shahnā.ī bhī

aaj se maiñ apne gītoñ meñ ātish-pāre bhar dūñgā

maddham lachkīlī tānoñ meñ jīvaT dhāre bhar dūñgā

jīvan ke añdhiyāre path par mish.al le kar niklūñgā

dhartī ke phaile āñchal meñ surḳh sitāre bhar dūñgā

aaj se ai mazdūr kisāno mere giit tumhāre haiñ

fāqa-kash insāno mere jog-bahāg tumhāre haiñ

jab tak tum bhūke nañge ho ye naġhme ḳhāmosh na hoñge

jab tak be-ārām ho tum ye naġhme rāhat-kosh na hoñge

mujh ko is kā rañj nahīñ hai log mujhe fankār na māneñ

fikr-o-fan ke tājir mere sheroñ ko ash.ār na māneñ

merā fan merī umīdeñ aaj se tum ko arpan haiñ

aaj se mere giit tumhāre dukh aur sukh kā darpan haiñ

tum se quvvat le kar ab maiñ tum ko raah dikhā.ūñgā

tum parcham lahrānā sāthī maiñ barbat par gā.uñgā

aaj se mere fan kā maqsad zanjīreñ pighlānā hai

aaj se maiñ shabnam ke badle añgāre barsā.ūñgā

ab tak mere giton mein ummid bhi thi paspai bhi

maut ke qadmon ki aahaT bhi jiwan ki angDai bhi

mustaqbil ki kirnen bhi thin haal ki bojhal zulmat bhi

tufanon ka shor bhi tha aur KHwabon ki shahnai bhi

aaj se main apne giton mein aatish-pare bhar dunga

maddham lachkili tanon mein jiwaT dhaare bhar dunga

jiwan ke andhiyare path par mishal le kar niklunga

dharti ke phaile aanchal mein surKH sitare bhar dunga

aaj se ai mazdur kisano mere git tumhaare hain

faqa-kash insano mere jog-bahag tumhaare hain

jab tak tum bhuke nange ho ye naghme KHamosh na honge

jab tak be-aram ho tum ye naghme rahat-kosh na honge

mujh ko is ka ranj nahin hai log mujhe fankar na manen

fikr-o-fan ke tajir mere sheron ko ashaar na manen

mera fan meri umiden aaj se tum ko arpan hain

aaj se mere git tumhaare dukh aur sukh ka darpan hain

tum se quwwat le kar ab main tum ko rah dikhaunga

tum parcham lahrana sathi main barbat par gaunga

aaj se mere fan ka maqsad zanjiren pighlana hai

aaj se main shabnam ke badle angare barsaunga