میرے ہاتھ

دل میں کب سے رم جھم کرتی

کیسی برکھا برس رہی ہے

اس برکھا کے امرت رس سے

بھیگ چکی میں بھیگ چکی میں

لگتی چھپتی دھوپ اور بادل

یہ آکاش کے ننھے بالک

کھیل رہے ہیں ہنستے ہنستے

کلکاری بھرتے سبزے کو

شوخ ہوائیں چھیڑ رہی ہیں

میں بھی اپنے پنکھ جھٹک کر

پر تولوں اور بھروں اڑانیں

اپنے بدن میں خود کھو جاؤں

یہ تن کا آکاش یہ دھرتی

دھیرے دھیرے پھیل رہی ہے

اور میرے ہاتھوں کے پکھیرو

یہ چنچل بے چین پرندے

ایک انوکھے راز سے بے کل

دھرتی میں کچھ ڈھونڈ رہے ہیں

ڈھونڈ رہے ہیں ایسے پل کو

جس کی کھوج میں دل رہتا ہے

جس پل دھرتی ملے گگن سے

وہ پل میرے تن کے باہر

کہیں نہیں ہے کہیں نہیں ہے

یہ پنچھی یہ نرم پکھیرو

جنموں سے دھرتی کے سنگی

اس کایا کے تال کنارے

دھیرے دھیرے ڈھونڈ رہے ہیں

کھوئے ہوئے پل کی کنکریاں