mere kamre mein utar aai KHamoshi phir se

mere kamre meñ utar aa.ī ḳhamoshī phir se

sāya-e-shām-e-ġharībāñ kī tarah

shorish-e-dīda-e-giryāñ kī tarah

mausam-e-kunj-e-bayābāñ kī tarah

kitnā be-nutq hai yādoñ kā hujūm

jaise hoñToñ kī fazā yaḳh-basta

jaise lafzoñ ko gahan lag jaa.e

jaise rūThe hue rastoñ ke musāfir chup-chāp

jaise marqad ke sirhāne koī ḳhāmosh charāġh

jaise sunsān se maqtal kī salīb

jaise kajlā.ī huī shab kā nasīb

mere kamre meñ utar aa.ī ḳhamoshī phir se

phir se zaḳhmoñ kī qatāreñ jāgīñ

avval-e-shām-e-charāġhāñ kī tarah

har na.e zaḳhm ne phir yaad dilāyā mujh ko

isī kamre meñ kabhī

mahfil-e-ahbāb ke saath

gungunāte hue lamhoñ ke shajar phailte the

raqs karte hue jazboñ ke dahakte lamhe

qarya-e-jāñ meñ lahū kī sūrat

sham-e-vāda kī tarah jalte the

saañs letī thī fazā meñ ḳhushbū

aañkh meñ gulban-e-marjāñ kī tarah

saañs ke saath guhar Dhalte the

aaj kyā kahiye ki aisā kyuuñ hai

shaam chup-chāp

fazā yaḳh-basta

dil mirā dil ki samundar kī tarah zinda thā

tere hote hue tanhā kyuuñ hai

to ki ḳhud chashma-e-āvāz bhī hai

merī mahram mirī hamrāz bhī hai

tere hote hue har samt udāsī kaisī

shaam chup-chāp

fazā yaḳh-basta

dil ke hamrāh badan TuuT rahā ho jaise

ruuh se rishta-e-jāñ chhūT rahā ho jaise

ai ki tū chashma-e-āvāz bhī hai

hāsil-e-naġhmagī-e-sāz bhī hai

lab-kushā ho ki sar-e-shām-e-figār

is se pahle ki shikasta-dil meñ

bad-gumānī kī koī tez kiran chubh jaa.e

is se pahle ki charāġh-e-va.ada

yak-ba-yak bujh jaa.e

lab-kushā ho ki fazā meñ phir se

jalte lafzoñ ke dahakte jugnū

tair jaa.eñ to sukūt-e-shab-e-uryāñ TuuTe

phir koī band-e-garebāñ TuuTe

lab-kushā ho ki mirī nas nas meñ

zahr bhar de na kahīñ

vaqt kī zaḳhm-faroshī phir se

lab-kushā ho ki mujhe Das legī

ḳhud-farāmoshī phir se

mere kamre meñ utar aa.ī

ḳhamoshī phir se

mere kamre mein utar aai KHamoshi phir se

saya-e-sham-e-ghariban ki tarah

shorish-e-dida-e-giryan ki tarah

mausam-e-kunj-e-bayaban ki tarah

kitna be-nutq hai yaadon ka hujum

jaise honTon ki faza yaKH-basta

jaise lafzon ko gahan lag jae

jaise ruThe hue raston ke musafir chup-chap

jaise marqad ke sirhane koi KHamosh charagh

jaise sunsan se maqtal ki salib

jaise kajlai hui shab ka nasib

mere kamre mein utar aai KHamoshi phir se

phir se zaKHmon ki qataren jagin

awwal-e-sham-e-charaghan ki tarah

har nae zaKHm ne phir yaad dilaya mujh ko

isi kamre mein kabhi

mahfil-e-ahbab ke sath

gungunate hue lamhon ke shajar phailte the

raqs karte hue jazbon ke dahakte lamhe

qarya-e-jaan mein lahu ki surat

sham-e-wada ki tarah jalte the

sans leti thi faza mein KHushbu

aankh mein gulban-e-marjaan ki tarah

sans ke sath guhar Dhalte the

aaj kya kahiye ki aisa kyun hai

sham chup-chap

faza yaKH-basta

dil mera dil ki samundar ki tarah zinda tha

tere hote hue tanha kyun hai

to ki KHud chashma-e-awaz bhi hai

meri mahram meri hamraaz bhi hai

tere hote hue har samt udasi kaisi

sham chup-chap

faza yaKH-basta

dil ke hamrah badan TuT raha ho jaise

ruh se rishta-e-jaan chhuT raha ho jaise

ai ki tu chashma-e-awaz bhi hai

hasil-e-naghmagi-e-saz bhi hai

lab-kusha ho ki sar-e-sham-e-figar

is se pahle ki shikasta-dil mein

bad-gumani ki koi tez kiran chubh jae

is se pahle ki charagh-e-wada

yak-ba-yak bujh jae

lab-kusha ho ki faza mein phir se

jalte lafzon ke dahakte jugnu

tair jaen to sukut-e-shab-e-uryan TuTe

phir koi band-e-gareban TuTe

lab-kusha ho ki meri nas nas mein

zahr bhar de na kahin

waqt ki zaKHm-faroshi phir se

lab-kusha ho ki mujhe Das legi

KHud-faramoshi phir se

mere kamre mein utar aai

KHamoshi phir se