mere KHwabon ka hindostan

kabhī jab lafz-e-āzādī kā sachchā tarjumāñ hogā

to phir ye hind ḳhvāboñ kā mire hindostāñ hogā

ubhar aa.egā ḳhuddārī kā jazba mulk vāloñ kā

faqat īsār hogā mudda.ā in ḳhush-ḳhayāloñ kā

na hogī chor-bāzārī na ayyārī na makkārī

na ye baaqī rahegī rishvatoñ kī garm-bāzārī

hukūmat kā jo Dhāñcha hai badal jā.egā ye yaksar

ki iḳhrājāt haiñ jo āj-kal ho jā.eñge kamtar

hukūmat meñ sabhī ahl-e-hunar ke qadr-dāñ hoñge

jo jāhil haiñ vasā.il se na apne kāmrāñ hoñge

na itne tax hī hoñge ki jin se jaan ho dūbhar

ḳhushī se tax sab deñge bachegā is qadr khā kar

mire hindostāñ ke khet jab dekho hare hoñge

anaaj itnā mire khaliyān ġhalle se bhare hoñge

maveshī is qadar hoñge baheñgī duudh kī nahreñ

masarrat ke samundar meñ uTheñgī har taraf lahreñ

mashīnoñ ke liye muhtāj hoñge ham na ġhairoñ ke

zarūrat kā har ik sāmāñ banegā mulk meñ apne

suhūlat barq-o-telephone kī hogī dehātoñ meñ

saḌak har gaañv tak ban jā.egī pakkī dehātoñ meñ

nikal ā.eñge kaafī is zamīñ se tel ke chashme

na ham muhtāj sone ke raheñge aur na lohe ke

na koī be-paḌhā-likhā na koī be-hunar hogā

na auroñ ke liye be-kār koī dard-e-sar hogā

hamāre mulk ko ik markaz-e-ta.alīm pā.eñge

yahāñ ta.alīm lene dūsre mulkoñ se ā.eñge

jo būḌhe hoñge aur mohtāj unheñ sarkār pālegī

yatīmoñ aur bevāoñ ko siine se lagā legī

hukūmat aur public ke bhale kirdār agar hoñge

to mausam aur dariyā bhī raheñge Thiik hī apne

hamāre dam kā lohā ahal-e-quvvat maan jā.eñge

jo haiñ kamzor har sūrat meñ haamī ham ko pā.eñge

ġharaz ye hai vo ḳhvāboñ kā mire hindostāñ hogā

na ik chehre pe jis meñ fikr-o-vahshat kā nishāñ hogā

na hogī bhuuk kī la.anat na bekārī na bīmārī

na hogī be-īmānī aur na ayyārī na ġhaddārī

shujā.at aur javāñ-mardī kā putlā hogā har insāñ

mohabbat aur ḳhidmat hogā har insān kā īmāñ

'shifā' mumkin hai aise din na merī ziist meñ aa.eñ

maiñ vo paudā lagā.ūñgā ki nasleñ jis kā phal khā.eñ

kabhi jab lafz-e-azadi ka sachcha tarjuman hoga

to phir ye hind KHwabon ka mere hindostan hoga

ubhar aaega KHuddari ka jazba mulk walon ka

faqat isar hoga muddaa in KHush-KHayalon ka

na hogi chor-bazari na ayyari na makkari

na ye baqi rahegi rishwaton ki garm-bazari

hukumat ka jo Dhancha hai badal jaega ye yaksar

ki iKHrajat hain jo aaj-kal ho jaenge kamtar

hukumat mein sabhi ahl-e-hunar ke qadr-dan honge

jo jahil hain wasail se na apne kaamran honge

na itne tax hi honge ki jin se jaan ho dubhar

KHushi se tax sab denge bachega is qadr kha kar

mere hindostan ke khet jab dekho hare honge

anaj itna mere khaliyan ghalle se bhare honge

maweshi is qadar honge bahengi dudh ki nahren

masarrat ke samundar mein uThengi har taraf lahren

mashinon ke liye muhtaj honge hum na ghairon ke

zarurat ka har ek saman banega mulk mein apne

suhulat barq-o-telephone ki hogi dehaton mein

saDak har ganw tak ban jaegi pakki dehaton mein

nikal aaenge kafi is zamin se tel ke chashme

na hum muhtaj sone ke rahenge aur na lohe ke

na koi be-paDha-likha na koi be-hunar hoga

na auron ke liye be-kar koi dard-e-sar hoga

hamare mulk ko ek markaz-e-talim paenge

yahan talim lene dusre mulkon se aaenge

jo buDhe honge aur mohtaj unhen sarkar palegi

yatimon aur bewaon ko sine se laga legi

hukumat aur public ke bhale kirdar agar honge

to mausam aur dariya bhi rahenge Thik hi apne

hamare dam ka loha ahal-e-quwwat man jaenge

jo hain kamzor har surat mein hami hum ko paenge

gharaz ye hai wo KHwabon ka mere hindostan hoga

na ek chehre pe jis mein fikr-o-wahshat ka nishan hoga

na hogi bhuk ki lanat na bekari na bimari

na hogi be-imani aur na ayyari na ghaddari

shujaat aur jawan-mardi ka putla hoga har insan

mohabbat aur KHidmat hoga har insan ka iman

'shifa' mumkin hai aise din na meri zist mein aaen

main wo pauda lagaunga ki naslen jis ka phal khaen