mere liye kya hai kuchh bhi nahin

ye gaañv kā manzar sannāTā aur shaam kī dhundlī tārīkī

ik shaam bahut rañgīn magar muflis kī nigāhoñ meñ phīkī

dhartī pe ye paanī sone kā ākāsh pe nahreñ chāñdī kī

ye chāñd ye taare ye dariyā mere liye kyā hai kuchh bhī nahīñ

ye shahr kī chaltī saḌkoñ par har samt dukāneñ nūrānī

bijlī meñ bhī jaltā ho jaise iflās ke patte kā paanī

chīzoñ kī girānī meñ shāmil ġhurbat ke lahū kī arzānī

ye saaz ye sāmān-e-ishrat mere liye kyā hai kuchh bhī nahīñ

rātoñ ke añdhere meñ jagmag jagmag ye fazā mai-ḳhvānoñ kī

mezoñ pe nazāre mastī ke bahkī huī lai dīvānoñ kī

botal kī navā-e-kulkul meñ halkī sī ḳhunuk paimānoñ kī

ye shīsha ye saaqī ye sahbā mere liye kyā hai kuchh bhī nahīñ

saḌkoñ pe hasīnoñ kā tāñtā jaadū kā parā chaltā phirtā

saaḌī kī lapeTūñ se jin kī chhilke hai javānī kī sahbā

mastī ke qadam sambhle sambhle āñchal kā sirā Dhalkā Dhalkā

ye husn-o-javānī rañg-o-adā mere liye kyā hai kuchh bhī nahīñ

āñkhoñ pe mirī ehsās hai kyā sabzoñ pe agar hai barnā.ī

kyuuñ pūchhne jā.ūñ kyārī meñ phūloñ kā mizāj-e-ra.anā.ī

kyā kaam hai mujh ko gulshan se kaliyāñ ho khilī yā murjhā.ī

ye phuul ye shabnam sher-o-fazā mere liye kyā hai kuchh bhī nahīñ

collage kī ye ta.amīr-e-ḳhandāñ mamnūn ġhamoñ laam nahīñ

is meñ kisī muflis ke ghar ke ġhamgīn pisar kā naam nahīñ

sāmān-e-tijārat hai ye bhī sāmān-e-mafād-e-ām nahīñ

ye ilm ye hikmat hosh-rubā mere liye kyā hai kuchh bhī nahīñ

be-jān ho jab naqsh-e-hastī tasvīr-e-tamannā kyā bole

tārāj ke ḳhūnī panje meñ tahzīb kī miinā kyā bole

chīloñ ke najāsat khāne meñ bechāra papīhā kyā bole

ye naġhma ye sher-o-sāz-o-navā mere liye kyā hai kuchh bhī nahīñ

ye ganw ka manzar sannaTa aur sham ki dhundli tariki

ek sham bahut rangin magar muflis ki nigahon mein phiki

dharti pe ye pani sone ka aakash pe nahren chandi ki

ye chand ye tare ye dariya mere liye kya hai kuchh bhi nahin

ye shahr ki chalti saDkon par har samt dukanen nurani

bijli mein bhi jalta ho jaise iflas ke patte ka pani

chizon ki girani mein shamil ghurbat ke lahu ki arzani

ye saz ye saman-e-ishrat mere liye kya hai kuchh bhi nahin

raaton ke andhere mein jagmag jagmag ye faza mai-KHwanon ki

mezon pe nazare masti ke bahki hui lai diwanon ki

botal ki nawa-e-kulkul mein halki si KHunuk paimanon ki

ye shisha ye saqi ye sahba mere liye kya hai kuchh bhi nahin

saDkon pe hasinon ka tanta jadu ka para chalta phirta

saDi ki lapeTun se jin ki chhilke hai jawani ki sahba

masti ke qadam sambhle sambhle aanchal ka sira Dhalka Dhalka

ye husn-o-jawani rang-o-ada mere liye kya hai kuchh bhi nahin

aankhon pe meri ehsas hai kya sabzon pe agar hai barnai

kyun puchhne jaun kyari mein phulon ka mizaj-e-ranai

kya kaam hai mujh ko gulshan se kaliyan ho khili ya murjhai

ye phul ye shabnam sher-o-faza mere liye kya hai kuchh bhi nahin

collage ki ye tamir-e-KHandan mamnun ghamon lam nahin

is mein kisi muflis ke ghar ke ghamgin pisar ka nam nahin

saman-e-tijarat hai ye bhi saman-e-mafad-e-am nahin

ye ilm ye hikmat hosh-ruba mere liye kya hai kuchh bhi nahin

be-jaan ho jab naqsh-e-hasti taswir-e-tamanna kya bole

taraj ke KHuni panje mein tahzib ki mina kya bole

chilon ke najasat khane mein bechaara papiha kya bole

ye naghma ye sher-o-saz-o-nawa mere liye kya hai kuchh bhi nahin