mere nadim!

ḳhayāl o sher kī duniyā meñ jaan thī jin se

fazā-e-fikr-o-amal arġhavān thī jin se

vo jin ke nuur se shādāb the mah-o-anjum

junūn-e-ishq kī himmat javān thī jin se

vo ārzueñ kahāñ so ga.ī haiñ mere nadīm?

vo nā-subūr nigāheñ, vo muntazir rāheñ

vo pās-e-zabt se dil meñ dabī huī aa.heñ

vo intizār kī rāteñ, tavīl tīra-o-tār

vo nīm-ḳhvāb, shabistāñ vo maḳhmalīñ bāheñ

kahāniyāñ thiiñ kahīñ kho ga.ī haiñ mere nadīm

machal rahā hai rag-e-zindagī meñ ḳhūn-e-bahār

ulajh rahe haiñ purāne ġhamoñ se ruuh ke taar

chalo ki chal ke charāġhāñ kareñ dayār-e-habīb

haiñ intizār meñ aglī mohabbatoñ ke mazār

mohabbateñ jo fanā ho ga.ī haiñ mere nadīm!

KHayal o sher ki duniya mein jaan thi jin se

faza-e-fikr-o-amal arghawan thi jin se

wo jin ke nur se shadab the mah-o-anjum

junun-e-ishq ki himmat jawan thi jin se

wo aarzuen kahan so gai hain mere nadim?

wo na-subur nigahen, wo muntazir rahen

wo pas-e-zabt se dil mein dabi hui aahen

wo intizar ki raaten, tawil tira-o-tar

wo nim-KHwab, shabistan wo maKHmalin bahen

kahaniyan thin kahin kho gai hain mere nadim

machal raha hai rag-e-zindagi mein KHun-e-bahaar

ulajh rahe hain purane ghamon se ruh ke tar

chalo ki chal ke charaghan karen dayar-e-habib

hain intizar mein agli mohabbaton ke mazar

mohabbaten jo fana ho gai hain mere nadim!