mere pas kya kuchh nahin

mere paas rātoñ kī tārīkī meñ

khilne vaale phuul haiñ

aur be-ḳhvābī

dinoñ kī murjhā.ī huī raushnī hai

aur bīnā.ī

mere paas lauT jaane ko ek maazī hai

aur yaad...

mere paas masrūfiyat kī tamām tar rañgā-rañgī hai

aur be-ma.anaviyat

aur in sab se pare khulne vaalī aañkh

maiñ āsmāñ ko oḌh kar chaltā

aur zamīn ko bichhaunā kartā huuñ

jahāñ maiñ huuñ

vahāñ abdiyat apnī girheñ kholtī hai

jañgal jhūmte haiñ

bādal baraste haiñ

mor nāchte haiñ

mere siine meñ ek samundar ne panāh le rakkhī hai

maiñ apnī aag meñ jaltā

apnī bārishoñ meñ nahātā huuñ

merī āvāz meñ

bahut sī āvāzoñ ne ghar kar rakkhā hai

aur merā libās

bahut sī dhajjiyoñ ko joḌ kar tayyār kiyā gayā hai

merī āñkhoñ meñ

ek girte hue shahr kā saarā malba hai

aur ek mustaqil intizār

aur aañsū

aur in āñsuoñ se phuul khilte haiñ

tālāb bante haiñ

jin meñ parinde nahāte haiñ

hañste aur ḳhvāb dekhte haiñ

mere paas

duniyā ko sunāne ke liye kuchh giit haiñ

aur batāne ke liye kuchh bāteñ

maiñ rad kiye jaane kī lazzat se āshnā huuñ

aur pazīrā.ī kī dil-nashīñ muskurāhaT se

bharā rahtā huuñ

mere paas

ek āshiq kī vāraftagī

dar-guzar aur be-niyāzī hai

tumhārī is duniyā meñ

mere paas kyā kuchh nahīñ hai

vaqt aur tum par iḳhtiyār ke sivā?

mere pas raaton ki tariki mein

khilne wale phul hain

aur be-KHwabi

dinon ki murjhai hui raushni hai

aur binai

mere pas lauT jaane ko ek mazi hai

aur yaad

mere pas masrufiyat ki tamam tar ranga-rangi hai

aur be-manawiyat

aur in sab se pare khulne wali aankh

main aasman ko oDh kar chalta

aur zamin ko bichhauna karta hun

jahan main hun

wahan abdiyat apni girhen kholti hai

jangal jhumte hain

baadal baraste hain

mor nachte hain

mere sine mein ek samundar ne panah le rakkhi hai

main apni aag mein jalta

apni barishon mein nahata hun

meri aawaz mein

bahut si aawazon ne ghar kar rakkha hai

aur mera libas

bahut si dhajjiyon ko joD kar tayyar kiya gaya hai

meri aankhon mein

ek girte hue shahr ka sara malba hai

aur ek mustaqil intizar

aur aansu

aur in aansuon se phul khilte hain

talab bante hain

jin mein parinde nahate hain

hanste aur KHwab dekhte hain

mere pas

duniya ko sunane ke liye kuchh git hain

aur batane ke liye kuchh baaten

main rad kiye jaane ki lazzat se aashna hun

aur pazirai ki dil-nashin muskurahaT se

bhara rahta hun

mere pas

ek aashiq ki waraftagi

dar-guzar aur be-niyazi hai

tumhaari is duniya mein

mere pas kya kuchh nahin hai

waqt aur tum par iKHtiyar ke siwa?