meri aahaT

merī aahaT guuñj rahī hai

duniyā kī har rāhguzar meñ

uushā mere naqsh-e-qadam par

ḳhushbū kī pichkārī le kar

rañg chhiḌaktī jaatī hai

sūraj ke albele muġhannī

jumbish pā ke sargam par

sañgīt sunāte jaate haiñ

sajī-sajā.ī shaam kī dulhan

shab kī siyah-andām abhāgan

mere man kī nāzuk dhaḌkan

ek hī taal pe lahrātī haiñ

chanchal lahreñ sarkash zarre

kohre kī bāñhoñ meñ saa.e

gard-e-kaf-e-pā ke sayyāre

ek hī gat par naach rahe haiñ

merī aahaT guuñj rahī hai

duniyā kī har rāhguzar meñ

phir bhī yuuñ lagtā hai jaise

ye giitī bā-vasf-e-vus.at

ek akelī bastī hai

aur jaise har bazm-ārā.ī

ik iz.hār-e-tanhā.ī hai

aur jaise ye chāñd sitāre

sūraj, dariyā, sahrā

mausam barr-e-āzam

sab mauhūm dhundalke haiñ

sab merī pā.inda anā ke jalte bujhte haale haiñ

sab āvāzeñ faanī haiñ

ik merī aahaT lāfānī hai

meri aahaT gunj rahi hai

duniya ki har rahguzar mein

usha mere naqsh-e-qadam par

KHushbu ki pichkari le kar

rang chhiDakti jati hai

suraj ke albele mughanni

jumbish pa ke sargam par

sangit sunate jate hain

saji-sajai sham ki dulhan

shab ki siyah-andam abhagan

mere man ki nazuk dhaDkan

ek hi tal pe lahraati hain

chanchal lahren sarkash zarre

kohre ki banhon mein sae

gard-e-kaf-e-pa ke sayyare

ek hi gat par nach rahe hain

meri aahaT gunj rahi hai

duniya ki har rahguzar mein

phir bhi yun lagta hai jaise

ye giti ba-wasf-e-wusat

ek akeli basti hai

aur jaise har bazm-arai

ek izhaar-e-tanhai hai

aur jaise ye chand sitare

suraj, dariya, sahra

mausam barr-e-azam

sab mauhum dhundalke hain

sab meri painda ana ke jalte bujhte haale hain

sab aawazen fani hain

ek meri aahaT lafani hai