meri ek buri aadat thi

merī ek burī aadat thī

tū merī aadat ke hāthoñ kaisī zich aur kitnī diq thī

jab hairat kī uñglī thāme tere saath chalā kartā thā

ik shīrīñ muskān kī beleñ mere tan buuTe ke uupar istehqāq se chaḌhtī thiiñ

aur ik lams kā gaatā paanī nas nas diip jalātā thā

lams ke jugnū aur muskān kī titlī mere khilaune the

in donoñ kī duurī sahnā jiine jaisā mushkil thā

in ko pallū meñ bāñdhe tū jab bhī duur kahīñ jaatī thī

maiñ visvās kī Dor se lipTā pīchhe pīchhe aa jaatā thā

sab logoñ se, har raste se terā pata pūchhā kartā thā

ab hairat kī uñglī thāme tū ik aise des ga.ī hai

jis ke sab bāzār aur galiyāñ, saare ghar aur sab chaubāre

gahrī dhund meñ sar-basta haiñ, guzre kal se paivasta haiñ

maiñ is dhund ke chaurāhe par nam ā.ankhoñ ko poñchh rahā huuñ

rote rote soch rahā huuñ

kis ko rokūñ kis se pūchhūñ kyā merī maañ ko dekhā hai?

is raste se ho ke ga.ī thī

apnī ek burī aadat se kaisā zich aur kitnā diq huuñ

meri ek buri aadat thi

tu meri aadat ke hathon kaisi zich aur kitni diq thi

jab hairat ki ungli thame tere sath chala karta tha

ek shirin muskan ki belen mere tan buTe ke upar istehqaq se chaDhti thin

aur ek lams ka gata pani nas nas dip jalata tha

lams ke jugnu aur muskan ki titli mere khilaune the

in donon ki duri sahna jine jaisa mushkil tha

in ko pallu mein bandhe tu jab bhi dur kahin jati thi

main wiswas ki Dor se lipTa pichhe pichhe aa jata tha

sab logon se, har raste se tera pata puchha karta tha

ab hairat ki ungli thame tu ek aise des gai hai

jis ke sab bazar aur galiyan, sare ghar aur sab chaubare

gahri dhund mein sar-basta hain, guzre kal se paiwasta hain

main is dhund ke chaurahe par nam aaankhon ko ponchh raha hun

rote rote soch raha hun

kis ko rokun kis se puchhun kya meri man ko dekha hai?

is raste se ho ke gai thi

apni ek buri aadat se kaisa zich aur kitna diq hun