meri hi koi baat

bāhar ek āvāz hai

tamām āvāzoñ se muḳhtalif

fazā kī murda shiryānoñ meñ

ek taaza sachchā.ī bhar dene vaalī āvāz

be-his makānoñ mañDlātī huī

mere darvāze par dastak detī huī

kabhī maddham kabhī tez

ek bechain dastak

mujh se kuchh kahnā chāhtī hai

mujh tak pahuñchānā chāhtī hai

thoḌe hī fāsle par khaḌe ek mausam kī baat

shāyad merī hī koī baat

lekin maiñ darvāze tak kaise jā.ūñ

use kaise kholūñ

bāhar khaḌe mausam ko andar kaise lā.ūñ

maiñ to arsa huā

apne haath paañv

ba-taur-e-zamānat rakh chukā huuñ

kis jurm meñ

kis ke paas rakh chukā huuñ

bilkul bhuul chukā huuñ

bahar ek aawaz hai

tamam aawazon se muKHtalif

faza ki murda shiryanon mein

ek taza sachchai bhar dene wali aawaz

be-his makanon manDlati hui

mere darwaze par dastak deti hui

kabhi maddham kabhi tez

ek bechain dastak

mujh se kuchh kahna chahti hai

mujh tak pahunchana chahti hai

thoDe hi fasle par khaDe ek mausam ki baat

shayad meri hi koi baat

lekin main darwaze tak kaise jaun

use kaise kholun

bahar khaDe mausam ko andar kaise laun

main to arsa hua

apne hath panw

ba-taur-e-zamanat rakh chuka hun

kis jurm mein

kis ke pas rakh chuka hun

bilkul bhul chuka hun