meri ramaen adhuri hai abhi

merī rāmā.en adhūrī hai abhī

merī siitā

aur mujh meñ haa.il duurī hai abhī

merī siitā udaas hai

rishtoñ kā phailā ban-bās hai

phirnā hai mujhe abhī

jañgal jañgal sahrā sahrā sāgar sāgar

merā hamza vahī merā lachhman hai abhī

zamāna to ayyār hai

sau bhes badal letā hai

sādhūoñ ke bahrūp meñ haiñ poshīda abhī

na jaane rākshash kitne

aaj phir

zamāne ne chhal liyā hai mujhe

merī siitā ko

hālāt ke rāvan ne

har liyā hai abhī

duur bahut duur

merī nigāhoñ se ojhal

sāhil samundar kī ret par

vo be-sudh paḌī ro rahī hai abhī

tāham

apnī shikasta haalī se

is ne haar nahīñ maanī hai abhī

vaqt ke lankeshvar ke aage

us ne aatm samarpan kiyā nahīñ hai abhī

riit meñ dhañsī apnī nannhī sī kashtī ko

vo tak rahī hai ġhaur se

apne raam ke qadmoñ kī aahaT

kī muntazir samā.at ko sameTe hue

sarāpā-bagosh banī

dukh kī bhaTTī meñ tap ke nikhar rahī hai abhī

milan kī shubh ghaḌī kā use abhī hai yaqīn

is ke ḳhushk hoñToñ pe hai merā hī naam

raam raam raam

sāhibo

haqīqat to ye hai ki rākshas bāhar nahīñ hai kahīñ

rākshas to ḳhud apne andar

darūn-e-ḳhāna-e-dil meñ rū-posh hai kahīñ

merī siitā

merī bholī bhālī siitā ko

intizār us sunahre pul kā hai

jab merā ġhussa shānt hogā

aur mere andar se

mariyāda purush raam utpann hoñge kabhī na kabhī

tab rāvan apne aap hī parāst ho jā.egā

tabhī raam jī apnī siitā ko

apne pahlū meñ uThā kar le jā.eñge

apne dil ke singhāsan par biThā.eñge tabhī

tabhī diip jaleñge

ghar āñgan meñ uupar nīche chāroñ aur

tabhī din dasahrā hogā

tabhī raat dīvālī hogī

merī rāmāyan adhūrī hai abhī

phirnā hai mujhe abhī

jañgal jañgal sahrā sahrā sāgar sāgar

meri ramaen adhuri hai abhi

meri sita

aur mujh mein hail duri hai abhi

meri sita udas hai

rishton ka phaila ban-bas hai

phirna hai mujhe abhi

jangal jangal sahra sahra sagar sagar

mera hamza wahi mera lachhman hai abhi

zamana to ayyar hai

sau bhes badal leta hai

sadhuon ke bahrup mein hain poshida abhi

na jaane rakshash kitne

aaj phir

zamane ne chhal liya hai mujhe

meri sita ko

haalat ke rawan ne

har liya hai abhi

dur bahut dur

meri nigahon se ojhal

sahil samundar ki ret par

wo be-sudh paDi ro rahi hai abhi

taham

apni shikasta haali se

is ne haar nahin mani hai abhi

waqt ke lankeshwar ke aage

us ne aatm samarpan kiya nahin hai abhi

rit mein dhansi apni nannhi si kashti ko

wo tak rahi hai ghaur se

apne ram ke qadmon ki aahaT

ki muntazir samaat ko sameTe hue

sarapa-bagosh bani

dukh ki bhaTTi mein tap ke nikhar rahi hai abhi

milan ki shubh ghaDi ka use abhi hai yaqin

is ke KHushk honTon pe hai mera hi nam

ram ram ram

sahibo

haqiqat to ye hai ki rakshas bahar nahin hai kahin

rakshas to KHud apne andar

darun-e-KHana-e-dil mein ru-posh hai kahin

meri sita

meri bholi bhaali sita ko

intizar us sunahre pul ka hai

jab mera ghussa shant hoga

aur mere andar se

mariyaada purush ram utpann honge kabhi na kabhi

tab rawan apne aap hi parast ho jaega

tabhi ram ji apni sita ko

apne pahlu mein uTha kar le jaenge

apne dil ke singhasan par biThaenge tabhi

tabhi dip jalenge

ghar aangan mein upar niche chaaron aur

tabhi din dasahra hoga

tabhi raat diwali hogi

meri ramayan adhuri hai abhi

phirna hai mujhe abhi

jangal jangal sahra sahra sagar sagar