meri shaeri

mirī shā.erī hai nazāroñ kī duniyā

ye naġhma-sarā joibāroñ kī duniyā

ye hañgāma-zār ābshāroñ kī duniyā

falak-āshnā kohsāroñ kī duniyā

ye phūloñ kī bastī bahāroñ kī duniyā

yahī hai mire shah-kāroñ kī duniyā

mirī shā.erī hai nazāroñ kī duniyā

mirī shā.erī chāñd tāroñ kī duniyā

ye rañgīñ gharauñdā tilism-e-zamāna

khilaunoñ kā hai ik baḌā kārḳhāna

havā bāñdhnā aur ġhubāre banānā

ġhubāre banā kar fazā meñ uḌānā

mire sher kā sho.abada hai purānā

mirī shā.erī chāñd tāroñ kī duniyā

mirī shā.erī baḳht-yāroñ kī duniyā

falak shāmiyāna hai parbat qanāteñ

isī oT meñ dīda-o-dil kī ghāteñ

hujūm-e-tamannā ḳhushī kī barāteñ

javānī ke din kāmrānī kī rāteñ

mire sher kī ye bhī haiñ vārdāteñ

mirī shā.erī baḳht-yāroñ kī duniyā

mirī shā.erī ḳhār-zāroñ kī duniyā

tahī-dastī o pastī o ḳhasta-hālī

bagūloñ se ma.amūr phūloñ se ḳhālī

vo besha ki hai mazra-e-ḳhushk-sālī

jahāñ abr bhūlā hai dariyā-navālī

na bhūlī use bhī mirī fikr-e-ālī

mirī shā.erī ḳhārzāroñ kī duniyā

mirī shā.erī shahsavāroñ kī duniyā

bahādur jarī sūrmā aur jiyāle

qazā jin kī Dhāleñ qadar jin ke bhāle

tahavvur ke ghoḌoñ kī bāgeñ sambhāle

chale haiñ sū-e-razm-gah azm vaale

mire sher haiñ ġhāziyoñ ke risāle

mirī shā.erī shahsavāroñ kī duniyā

mirī shā.erī dil-figāroñ kī duniyā

ye fariyād-e-ḳhāmosh nīchī nigāheñ

ye armāñ ki masdūd haiñ jin kī rāheñ

fareb-e-vafā se kahāñ tak nibāheñ

mire dīda-o-dil haiñ in kī panāheñ

mire sher aañsū mire sher aa.heñ

mirī shā.erī dil-figāroñ kī duniyā

mirī shā.erī be-qarāroñ kī duniyā

vo zarra ki rāh-e-sukūñ meñ muḳhil hai

vo qatra ki sad-ātish-e-mushta.il hai

vo diida ki bedārī-e-mustaqil hai

vo dil jis se dil garmī-e-āb-o-gil hai

mire sher meñ bhī vahī ek dil hai

mirī shā.erī be-qarāroñ kī duniyā

mirī shā.erī ḳhāksāroñ kī duniyā

baserā ḳhas-o-ḳhār-o-ḳhāshāk par hai

magar haath har ḳhosha-e-tāk par hai

agarche sar-e-be-ḳhudī ḳhaak par hai

dimāġh-e-ḳhudī auj-e-aflāk par hai

mire sher kī aañkh idrāk par hai

mirī shā.erī ḳhāksāroñ kī duniyā

mirī shā.erī bāda-ḳhvāroñ kī duniyā

chale jām-e-jam bhī jame bazm-e-mai bhī

magar sāqiyā dekh ik aur shai bhī

ye fariyād merī ki hai jis meñ lai bhī

ye naala mirā jo hai pāband-e-nai bhī

mirā sher shīsha bhī nashsha bhī mai bhī

mirī shā.erī bāda-ḳhvāroñ kī duniyā

mirī shā.erī dost-dāroñ kī duniyā

ye duniyā jahāñ se alag ik jahāñ hai

ye dil-navāzī kā sikka ravāñ hai

yahāñ āsmāñ hai magar mehrbāñ hai

na jaane adāvat kī duniyā kahāñ hai

mirā sher iḳhlās kā tarjumāñ hai

marī shā.erī dost-dāroñ kī duniyā

mirī shā.erī ġhamgusāroñ kī duniyā

falak mahr-parvar zamīñ mah-jabīñ hai

na vo sard-mehr aur na ye garm-kīñ hai

falak bhī hasīñ hai zamīñ bhī hasīñ hai

vo nūr-āfrīñ ye zuhūr-āfrīñ hai

mire aa.ine meñ kudūrat nahīñ hai

mirī shā.erī ġhamgusāroñ kī duniyā

mirī shā.erī mere pyāroñ kī duniyā

vo pyāre ki sū-e-adam jā chuke haiñ

vo kaliyāñ vo ġhunche jo murjhā chuke haiñ

tarāne jo ārām farmā chuke haiñ

ḳhazāne jinheñ log dafnā chuke haiñ

mire sher meñ zindagī pā chuke haiñ

mirī shā.erī mere pyāroñ kī duniyā

mirī shā.erī intizāroñ kī duniyā

kabhī maiñ bhī ho jā.ūñ āzād shāyad

asīrī kī ghaT jaa.e mī.ād shāyad

sunī jaa.e ik roz fariyād shāyad

vo bhūle se kar le mujhe yaad shāyad

vahāñ kaam aa.e ye rūdād shāyad

mirī shā.erī intizāroñ kī duniyā

mirī shā.erī hai ishāroñ kī duniyā

falak par haiñ gardish meñ chāñd aur taare

zamīñ par bahār-o-ḳhizāñ ke nazāre

barābar chale jā rahe haiñ bichāre

ki zauq-e-nazar de rahā hai sahāre

magar kaun samjhe ye nāzuk ishāre

mirī shā.erī hai ishāroñ kī duniyā

meri shaeri hai nazaron ki duniya

ye naghma-sara joibaron ki duniya

ye hangama-zar aabshaaron ki duniya

falak-ashna kohsaron ki duniya

ye phulon ki basti bahaaron ki duniya

yahi hai mere shah-karon ki duniya

meri shaeri hai nazaron ki duniya

meri shaeri chand taron ki duniya

ye rangin gharaunda tilism-e-zamana

khilaunon ka hai ek baDa karKHana

hawa bandhna aur ghubare banana

ghubare bana kar faza mein uDana

mere sher ka shoabada hai purana

meri shaeri chand taron ki duniya

meri shaeri baKHt-yaron ki duniya

falak shamiyana hai parbat qanaten

isi oT mein dida-o-dil ki ghaten

hujum-e-tamanna KHushi ki baraaten

jawani ke din kaamrani ki raaten

mere sher ki ye bhi hain wardaten

meri shaeri baKHt-yaron ki duniya

meri shaeri KHar-zaron ki duniya

tahi-dasti o pasti o KHasta-haali

bagulon se mamur phulon se KHali

wo besha ki hai mazra-e-KHushk-sali

jahan abr bhula hai dariya-nawali

na bhuli use bhi meri fikr-e-ali

meri shaeri KHarzaron ki duniya

meri shaeri shahsawaron ki duniya

bahadur jari surma aur jiyale

qaza jin ki Dhaalen qadar jin ke bhaale

tahawwur ke ghoDon ki bagen sambhaale

chale hain su-e-razm-gah azm wale

mere sher hain ghaziyon ke risale

meri shaeri shahsawaron ki duniya

meri shaeri dil-figaron ki duniya

ye fariyaad-e-KHamosh nichi nigahen

ye arman ki masdud hain jin ki rahen

fareb-e-wafa se kahan tak nibahen

mere dida-o-dil hain in ki panahen

mere sher aansu mere sher aahen

meri shaeri dil-figaron ki duniya

meri shaeri be-qararon ki duniya

wo zarra ki rah-e-sukun mein muKHil hai

wo qatra ki sad-atish-e-mushtail hai

wo dida ki bedari-e-mustaqil hai

wo dil jis se dil garmi-e-ab-o-gil hai

mere sher mein bhi wahi ek dil hai

meri shaeri be-qararon ki duniya

meri shaeri KHaksaron ki duniya

basera KHas-o-KHar-o-KHashak par hai

magar hath har KHosha-e-tak par hai

agarche sar-e-be-KHudi KHak par hai

dimagh-e-KHudi auj-e-aflak par hai

mere sher ki aankh idrak par hai

meri shaeri KHaksaron ki duniya

meri shaeri baada-KHwaron ki duniya

chale jam-e-jam bhi jame bazm-e-mai bhi

magar saqiya dekh ek aur shai bhi

ye fariyaad meri ki hai jis mein lai bhi

ye nala mera jo hai paband-e-nai bhi

mera sher shisha bhi nashsha bhi mai bhi

meri shaeri baada-KHwaron ki duniya

meri shaeri dost-daron ki duniya

ye duniya jahan se alag ek jahan hai

ye dil-nawazi ka sikka rawan hai

yahan aasman hai magar mehrban hai

na jaane adawat ki duniya kahan hai

mera sher iKHlas ka tarjuman hai

mari shaeri dost-daron ki duniya

meri shaeri ghamgusaron ki duniya

falak mahr-parwar zamin mah-jabin hai

na wo sard-mehr aur na ye garm-kin hai

falak bhi hasin hai zamin bhi hasin hai

wo nur-afrin ye zuhur-afrin hai

mere aaine mein kudurat nahin hai

meri shaeri ghamgusaron ki duniya

meri shaeri mere pyaron ki duniya

wo pyare ki su-e-adam ja chuke hain

wo kaliyan wo ghunche jo murjha chuke hain

tarane jo aaram farma chuke hain

KHazane jinhen log dafna chuke hain

mere sher mein zindagi pa chuke hain

meri shaeri mere pyaron ki duniya

meri shaeri intizaron ki duniya

kabhi main bhi ho jaun aazad shayad

asiri ki ghaT jae miad shayad

suni jae ek roz fariyaad shayad

wo bhule se kar le mujhe yaad shayad

wahan kaam aae ye rudad shayad

meri shaeri intizaron ki duniya

meri shaeri hai ishaaron ki duniya

falak par hain gardish mein chand aur tare

zamin par bahaar-o-KHizan ke nazare

barabar chale ja rahe hain bichaare

ki zauq-e-nazar de raha hai sahaare

magar kaun samjhe ye nazuk ishaare

meri shaeri hai ishaaron ki duniya