meri talwar hai ye mera qalam

ek nazm ek ġhazal

uljhā uljhā sā koī

sher kaheñ

ek afsāna kahānī

yā koī ek kitāb

koī tasvīr

koī ḳhāka

koī ek ḳhayāl

dil ke ek kone meñ kahīñ

kaliyoñ ke chaTakne kī sadā

sub.h-dam is meñ bhīge hue

phūloñ kī mahak

duur dhuñdhlā.e hue

rangoñ ke parde se pare

Dūbte aur ubharte hue

naġhmoñ kī sadā

gahrī āñkhoñ meñ kahīñ

aañsū chhalakne se bhī pahle kā samāñ

gar kabhī aise hī

kuchh narm se jazbāt ko

alfāz kā pairāhan duuñ

hathkaḌī haath meñ paḌ jaatī hai

aur kāġhaz pe kisī

parda-e-sīmīñ kī tarah

ek ek kar ke

ubharte haiñ

hazāroñ chehre

bain karte hue

be-asar gumnām savāl

pūchhte haiñ ke ye insāf

lahū meñ kab tak

terī talvār hai ye terā qalam

aur phir dil ke kisī kone se

aatī hai sadā

kitne hī haath haiñ jo

narm se jazbāt raqam karte haiñ

ye qalam tesha o talvār hai

in hāthoñ meñ

amn-o-insāf kī

be-bāk tamannā ke liye

phir se ek baar use vaqf karo

ek nazm ek ghazal

uljha uljha sa koi

sher kahen

ek afsana kahani

ya koi ek kitab

koi taswir

koi KHaka

koi ek KHayal

dil ke ek kone mein kahin

kaliyon ke chaTakne ki sada

subh-dam is mein bhige hue

phulon ki mahak

dur dhundhlae hue

rangon ke parde se pare

Dubte aur ubharte hue

naghmon ki sada

gahri aankhon mein kahin

aansu chhalakne se bhi pahle ka saman

gar kabhi aise hi

kuchh narm se jazbaat ko

alfaz ka pairahan dun

hathkaDi hath mein paD jati hai

aur kaghaz pe kisi

parda-e-simin ki tarah

ek ek kar ke

ubharte hain

hazaron chehre

bain karte hue

be-asar gumnam sawal

puchhte hain ke ye insaf

lahu mein kab tak

teri talwar hai ye tera qalam

aur phir dil ke kisi kone se

aati hai sada

kitne hi hath hain jo

narm se jazbaat raqam karte hain

ye qalam tesha o talwar hai

in hathon mein

amn-o-insaf ki

be-bak tamanna ke liye

phir se ek bar use waqf karo