meri taswir

mirī tasvīr le kar kyā karoge

mirī tasvīr ik ḳhvāb-e-pareshāñ

chhupe haiñ is meñ lākhoñ ġham ke tūfāñ

mirī tasvīr le kar kyā karoge

mirī tasvīr hai māyūs-o-muztar

merī tasvīr ranj-o-ġham kā paikar

ye ik din baar ho jā.egī tum par

mirī tasvīr le kar kyā karoge

mirī tasvīr meñ kab zindagī hai

sarāpā ġham sarāpā bekasī hai

jabīñ raushan na hoñToñ par hañsī hai

mirī tasvīr le kar kyā karoge

mirī tasvīr hai kuchh dhundlī dhundlī

mirī tasvīr hai ashkoñ se bhīgī

mirī tasvīr hai khoī huī sī

mirī tasvīr le kar kyā karoge

na phir hāthoñ meñ yuuñ loge tum us ko

na apne paas rakkhoge tum us ko

uThā kar pheñk hī doge tum us ko

mirī tasvīr le kar kyā karoge

meri taswir le kar kya karoge

meri taswir ek KHwab-e-pareshan

chhupe hain is mein lakhon gham ke tufan

meri taswir le kar kya karoge

meri taswir hai mayus-o-muztar

meri taswir ranj-o-gham ka paikar

ye ek din bar ho jaegi tum par

meri taswir le kar kya karoge

meri taswir mein kab zindagi hai

sarapa gham sarapa bekasi hai

jabin raushan na honTon par hansi hai

meri taswir le kar kya karoge

meri taswir hai kuchh dhundli dhundli

meri taswir hai ashkon se bhigi

meri taswir hai khoi hui si

meri taswir le kar kya karoge

na phir hathon mein yun loge tum us ko

na apne pas rakkhoge tum us ko

uTha kar phenk hi doge tum us ko

meri taswir le kar kya karoge