michelanjelo ki ek raat

aadam kī pahlī āvāz

in pattharoñ meñ ab bhī

chamak rahī hai jinheñ pahlī

baar maiñ ne apnī apnī zamīñ

maiñ dekhā merī sar-zamīñ

un barfāb jismoñ se ābād hai

jin jismoñ meñ ḳhūb-sūrat

āñkheñ na.ī jannat kī safīr haiñ fidyas

maiñ tujhe

ek na.e insān kā chehrā

dikhātā huuñ us chehre par

insāniyat kā ġhrēce hai aur

azmat-e-ādam kī vo tasvīr hai

jo hamesha merī zamīn par chamaktī

rahegī maiñ aadam ko

fitrat se aziim samajhtā huuñ

merī rātoñ meñ patthar chamakte

maiñ aur mere din

marmar kī rātoñ se ziyāda raushan haiñ

ye dekh ye aadam hai jis par raushnī

dāhine kañdhe se nīche gir rahī hai

raushan-dān kā darvāza band na karo

abhī aadam ko apnī hī zamīn ke liye is

raushnī kī zarūrat hai aur merī zamīn

par ab bhī vo saaya maujūd hai jis

saa.e meñ an-ginat rāteñ an-ginat

rañg aur an-ginat chehre maujūd haiñ

in añdhere meñ rafail hī nahīñ

rodan aur henrimor bhī ghuum rahe haiñ

apne apne mujassamoñ ke saath magar meñ

ab ek na.e aadam kā mujassama banā.ūñgā

jis aadam ke chehre par apnī zamīñ kī miTTī ke

saath apnī zamīn kā sūraj bhī chamkegā

kaash maiñ is na.e sūraj kā

mujassama banā sakūñ

aadam ki pahli aawaz

in pattharon mein ab bhi

chamak rahi hai jinhen pahli

bar main ne apni apni zamin

main dekha meri sar-zamin

un barfab jismon se aabaad hai

jin jismon mein KHub-surat

aankhen nai jannat ki safir hain fidyas

main tujhe

ek nae insan ka chehra

dikhata hun us chehre par

insaniyat ka ghreece hai aur

azmat-e-adam ki wo taswir hai

jo hamesha meri zamin par chamakti

rahegi main aadam ko

fitrat se azim samajhta hun

meri raaton mein patthar chamakte

main aur mere din

marmar ki raaton se ziyaada raushan hain

ye dekh ye aadam hai jis par raushni

dahine kandhe se niche gir rahi hai

raushan-dan ka darwaza band na karo

abhi aadam ko apni hi zamin ke liye is

raushni ki zarurat hai aur meri zamin

par ab bhi wo saya maujud hai jis

sae mein an-ginat raaten an-ginat

rang aur an-ginat chehre maujud hain

in andhere mein rafail hi nahin

rodan aur henrimor bhi ghum rahe hain

apne apne mujassamon ke sath magar mein

ab ek nae aadam ka mujassama banaunga

jis aadam ke chehre par apni zamin ki miTTi ke

sath apni zamin ka suraj bhi chamkega

kash main is nae suraj ka

mujassama bana sakun