mirabai ki ek taswir

kirshn bhagvān kā adnā sā pujārī huuñ maiñ

mujh ko giitā se hai ta.alīm milī bhagTī kī

haq-parastoñ se hai bharpūr aqīdat mujh ko

mujh ko iisā se bhī hai pyaar mohammad se bhī

merā kamra jo parastish ke liye hai us meñ

nuur barsātī haiñ valiyoñ kī hasīñ tasvīreñ

dekh kar un ko khil uThtā hai mire dil kā kañval

mere maazī ke haiñ ḳhvāboñ kī yahī ta.abīreñ

in meñ gautam bhī hai nānak bhī hai aur raam bhī hai

raam kirshn aur kabīr aur hai nanda naa.ī

al-ġharaz aise hī in pahuñche hue santoñ meñ

jalva-gar kaif ke aalam meñ hai mīrābā.ī

naqsh is darja hasīñ hai ye ki bas kyā kahiye

husn tasvīr kā nazroñ meñ khubā jaatā hai

rang mastī hai kuchh aisā ki bayāñ kyā kiije

dekhte hī jise dil vajd meñ aa jaatā hai

kitnī sadiyoñ kī shab-o-roz riyāzat ke tufail

aadmī nuur kī halkī sī jhalak paatā hai

ruḳh se salmā-e-haqīqat ke jab uThtī hai naqāb

jām-e-dil bāda-e-mastī se chhalak jaatā hai

jaan le asl haqīqat ko jo insāñ us ke

dil meñ ik prem kā tūfān umañD aatā hai

duur jab shīsha-e-dil se ho ġhubār-e-pindār

ek hī nuur har ik chiiz meñ vo paatā hai

apne bhagtoñ ko ġham-e-dil se chhuḌāne ke liye

apne gītoñ se fazā meñ abhī ras gholegī

aisā lagtā hai ki khul jā.eñgī us kī āñkheñ

aisā lagtā hai ye tasvīr abhī bolegī

jāñ-fishānī se banā.ī hai ye jis ne tasvīr

us kā ehsān zamāne pe baḌā bhārī hai

jis kī taḳhlīq se duniyā ko mayassar ho sukūñ

usī fankār kī duniyā meñ parastārī hai

rang-e-mastī hai kuchh aisā ki bayāñ kyā kiije

dekhte hī jise dil vajd meñ aa jaatā hai

naqsh is darja hasīñ hai ye ki bas kyā kahiye

husn tasvīr kā nazroñ meñ khubā jaatā hai

kirshn bhagwan ka adna sa pujari hun main

mujh ko gita se hai talim mili bhagTi ki

haq-paraston se hai bharpur aqidat mujh ko

mujh ko isa se bhi hai pyar mohammad se bhi

mera kamra jo parastish ke liye hai us mein

nur barsati hain waliyon ki hasin taswiren

dekh kar un ko khil uThta hai mere dil ka kanwal

mere mazi ke hain KHwabon ki yahi tabiren

in mein gautam bhi hai nanak bhi hai aur ram bhi hai

ram kirshn aur kabir aur hai nanda nai

al-gharaz aise hi in pahunche hue santon mein

jalwa-gar kaif ke aalam mein hai mirabai

naqsh is darja hasin hai ye ki bas kya kahiye

husn taswir ka nazron mein khuba jata hai

rang masti hai kuchh aisa ki bayan kya kije

dekhte hi jise dil wajd mein aa jata hai

kitni sadiyon ki shab-o-roz riyazat ke tufail

aadmi nur ki halki si jhalak pata hai

ruKH se salma-e-haqiqat ke jab uThti hai naqab

jam-e-dil baada-e-masti se chhalak jata hai

jaan le asl haqiqat ko jo insan us ke

dil mein ek prem ka tufan umanD aata hai

dur jab shisha-e-dil se ho ghubar-e-pindar

ek hi nur har ek chiz mein wo pata hai

apne bhagton ko gham-e-dil se chhuDane ke liye

apne giton se faza mein abhi ras gholegi

aisa lagta hai ki khul jaengi us ki aankhen

aisa lagta hai ye taswir abhi bolegi

jaan-fishani se banai hai ye jis ne taswir

us ka ehsan zamane pe baDa bhaari hai

jis ki taKHliq se duniya ko mayassar ho sukun

usi fankar ki duniya mein parastari hai

rang-e-masti hai kuchh aisa ki bayan kya kije

dekhte hi jise dil wajd mein aa jata hai

naqsh is darja hasin hai ye ki bas kya kahiye

husn taswir ka nazron mein khuba jata hai