mera hona na hona

mirā honā na honā munhasir hai

ek nuqte par

vo ik nuqta

jo do harfoñ ko aapas meñ milā kar

lafz kī tashkīl kartā hai

vo ik nuqta simaT jaa.e to

hone kā har ik imkāñ

na hone tak kā saarā fāsla

pal-bhar meñ tai kar le

vahī nuqta bikhar jaa.e

to har ik shai

na hone ke qafas kī tīliyoñ ko toḌ kar rakh de

vo ek nuqta mirī āñkhoñ meñ akasr

raushnī ke saath rañgoñ ko ugātā hai

mire idrāk meñ shabnam kī sūrat

yā sitāre kī tarah lauh-e-yaqīñ par jagmagātā hai

vahī nuqta mujhe tashkīk ke jañgal meñ

jugnū ban ke manzil kī taraf rasta dikhātā hai

mujhe akasr batātā hai

mirā honā na hone kā amal se

mire hone kī bhī takmīl hotī hai

vo ik nuqta kahāñ hai

kaun hai

kis ke laboñ meñ chhup ke har isbāt ko

inkār meñ tabdīl kartā hai

jo do harfoñ ko aapas meñ milā kar lafz kī tashkīl kartā hai

ye nukta bhī isī nuqte meñ muzmar hai

vo ek nuqta ki ab tak jis ke hone kā amiiñ huuñ maiñ

vo ifshā ho to maiñ samjhūñ

ki huuñ bhī yā nahīñ huuñ maiñ

mera hona na hona munhasir hai

ek nuqte par

wo ek nuqta

jo do harfon ko aapas mein mila kar

lafz ki tashkil karta hai

wo ek nuqta simaT jae to

hone ka har ek imkan

na hone tak ka sara fasla

pal-bhar mein tai kar le

wahi nuqta bikhar jae

to har ek shai

na hone ke qafas ki tiliyon ko toD kar rakh de

wo ek nuqta meri aankhon mein akasr

raushni ke sath rangon ko ugata hai

mere idrak mein shabnam ki surat

ya sitare ki tarah lauh-e-yaqin par jagmagata hai

wahi nuqta mujhe tashkik ke jangal mein

jugnu ban ke manzil ki taraf rasta dikhata hai

mujhe akasr batata hai

mera hona na hone ka amal se

mere hone ki bhi takmil hoti hai

wo ek nuqta kahan hai

kaun hai

kis ke labon mein chhup ke har isbaat ko

inkar mein tabdil karta hai

jo do harfon ko aapas mein mila kar lafz ki tashkil karta hai

ye nukta bhi isi nuqte mein muzmar hai

wo ek nuqta ki ab tak jis ke hone ka amin hun main

wo ifsha ho to main samjhun

ki hun bhi ya nahin hun main