mere azizo, mere rafiqo

mire azīzo, mire rafīqo

mirī communism se ho ḳhā.if

mirī tamannā se Dar rahe ho

magar mujhe kuchh gilā nahīñ hai

tumhārī rūhoñ kī sādgī se

tumhāre dil kī sanam-garī se

mujhe ye mahsūs ho rahā hai

ki jaise begāna havā bhī tak

tum apne andāz-e-dilbarī se

ki jaise vāqif nahīñ abhī tak

sitamgaroñ kī sitamgarī se

fareb ne jin ke aadmī ko

haqīr o buzdil banā diyā hai

haqīqatoñ ke muqāble meñ

farār karnā sikhā dayā hai

tumheñ ye jis din pata chalegā

hayāt rañg-e-hinā nahīñ hai

hayāt husn-e-butāñ nahīñ hai

ye ek ḳhanjar-ba-kaf karishma

ek zahrīlā jām-e-mai hai

hamārī piirī ho yā javānī

malūl o afsurda zindagānī

shikasta-e-naġhma shikasta-e-nai hai

tumheñ ye jis din pata chalegā

ta.assubāt-e-kuhan ke parde

tumhārī āñkhoñ meñ jal-bujheñge

ye tum ne kaise samajh liyā hai

ki dil mirā ishq se hai ḳhālī

mirī nazar husn se hai aarī

qarīb aao tumheñ batā.ūñ

mujhe mohabbat hai aadmī se

mujhe mohabbat hai zindagī se

mujhe mohabbat hai mah-jabīnoñ

se, gul-ruḳhoñ se saman-e-baroñ se

kitāboñ se, roTiyoñ se, phūloñ se

pattharoñ se, samundaroñ se

mirī nigah meñ base hue haiñ

hazār andāz-e-dil-rubā.ī

maiñ apne siine ko chaak kar ke

agar tumheñ apnā dil dikhā.ūñ

to tum ko har zaḳhm ke chaman meñ

hazār sarv-e-ravāñ mileñge

udaas maġhmūm vādiyoñ meñ

hazār-hā naġhma-ḳhvāñ mileñge

hazār āriz, hazār sham.eñ

hazār qāmat, hazār ġhazleñ

subuk-ḳharāmāñ ġhazāl jaise

hazār armāñ hazār umīdeñ

falak pe tāroñ ke jaal jaise

magar koī toḌe de rahā hai

laraztī mizhgāñ ke nashtaroñ ko

diloñ ke andar utārtā hai

koī siyāsat ke ḳhanjaroñ ko

kisī ke zahrīle tez nāḳhun

uqaab ke panja-hā-e-ḳhūnīñ

kī tarah āñkhoñ pe aa rahe haiñ

gulāb se tan misāl-e-bismil

zamīn par tilmilā rahe haiñ

jo pyaas paanī kī muntazir thī

vo sūliyoñ par Tañgī huī hai

vo bhuuk roTī jo māñgtī thī

salīb-e-zar par chaḌhī huī hai

ye zulm kaisā, sitam ye kyā hai

maiñ sochtā huuñ ye kyā junūñ hai

jahāñ meñ nān-e-javīñ kī qīmat

kisī kī ismat, kisī kā ḳhuuñ hai

tumhīñ batāo mire azīzo

mire rafīqo, tumhīñ batāo

ye zindagī paara paara kyuuñ hai

hamārī pyārī hasīñ zamīñ par

ye qatl-gah kā nazāra kyuuñ hai

mujhe batāo ki aaj kaise

siyāh bārūd kī lakīreñ

kaTīle kājal, sajīle surme

ke bāñkpan se ulajh ga.ī haiñ

ḳhizāñ ke kāñToñ kī uñgliyāñ kyuuñ

har ik chaman se ulajh ga.ī haiñ

mujhe batāo lahū ne kaise

hinā ke jaadū ko dho diyā hai

hayāt ke pairahan ko insāñ

ke āñsuoñ ne bhigo diyā hai

batā sako to mujhe batāo

ki saaz naġhmoñ se kyuuñ haiñ rūThe

batā sako to mujhe batāo

ki taar kyuuñ paḌ ga.e haiñ jhūTe

mire azīzo, mare rafīqo

mirī communism kuchh nahīñ hai

ye ahd-e-hāzir kī aabrū hai

mirī communism kuchh nahīñ hai

ye ahd-e-hāzir kī aabrū hai

mirī communism zindagī ko

hasīñ banāne kī aarzū hai

ye ek ma.asūm justujū hai

tumhāre dil meñ bhī shāyad aisī

koī javāñ-sāl aarzū ho

koī ubaltī huī surāhī

koī mahaktā huā subū ho

zarā ye samjho mire azīzo

mire rafīqo zarā ye socho

tumhāre qabze meñ kyā nahīñ hai

tumhārī Thokar se jaag uThegī

tumhāre qadmoñ meñ jo zamīñ hai

bas ek itnī kamī hai yaaro

ki zauq begāna-e-yaqīñ hai

tumhārī āñkhoñ hī meñ hai sab kuchh

tumhārī āñkhoñ meñ sab jahāñ hai

tumhārī palkoñ ke nīche dhartī

tumhārī palkoñ par āsmāñ hai

tumhāre hāthoñ kī jumbihsoñ meñ

hai jū-e-rañg-e-bahār dekho

na dekho is be-sutūn-e-ġham ko

tum apne teshoñ kī dhaar dekho

tum apne teshe uThā ke laao

maiñ le ke apnī kudāl niklūñ

hazār-hā saal ke masā.ib

hazār-hā saal ke mazālim

jo ruuh o dil par pahāḌ ban kar

hazār-hā saal se dhare haiñ

ham apne teshoñ kī zarb-e-kārī

se un ke sīnoñ ko chhed Dāleñ

ye hai sirf ek shab kī mehnat

jo ahd kar leñ to ham sahar tak

hayāt-e-nau ke na.e ajantā

na.e ellora tarāsh Dāleñ

mere azizo, mere rafiqo

meri communism se ho KHaif

meri tamanna se Dar rahe ho

magar mujhe kuchh gila nahin hai

tumhaari ruhon ki sadgi se

tumhaare dil ki sanam-gari se

mujhe ye mahsus ho raha hai

ki jaise begana hawa bhi tak

tum apne andaz-e-dilbari se

ki jaise waqif nahin abhi tak

sitamgaron ki sitamgari se

fareb ne jin ke aadmi ko

haqir o buzdil bana diya hai

haqiqaton ke muqable mein

farar karna sikha daya hai

tumhein ye jis din pata chalega

hayat rang-e-hina nahin hai

hayat husn-e-butan nahin hai

ye ek KHanjar-ba-kaf karishma

ek zahrila jam-e-mai hai

hamari piri ho ya jawani

malul o afsurda zindagani

shikasta-e-naghma shikasta-e-nai hai

tumhein ye jis din pata chalega

tassubaat-e-kuhan ke parde

tumhaari aankhon mein jal-bujhenge

ye tum ne kaise samajh liya hai

ki dil mera ishq se hai KHali

meri nazar husn se hai aari

qarib aao tumhein bataun

mujhe mohabbat hai aadmi se

mujhe mohabbat hai zindagi se

mujhe mohabbat hai mah-jabinon

se, gul-ruKHon se saman-e-baron se

kitabon se, roTiyon se, phulon se

pattharon se, samundaron se

meri nigah mein base hue hain

hazar andaz-e-dil-rubai

main apne sine ko chaak kar ke

agar tumhein apna dil dikhaun

to tum ko har zaKHm ke chaman mein

hazar sarw-e-rawan milenge

udas maghmum wadiyon mein

hazar-ha naghma-KHwan milenge

hazar aariz, hazar shamen

hazar qamat, hazar ghazlen

subuk-KHaraman ghazal jaise

hazar arman hazar umiden

falak pe taron ke jal jaise

magar koi toDe de raha hai

larazti mizhgan ke nashtaron ko

dilon ke andar utarta hai

koi siyasat ke KHanjaron ko

kisi ke zahrile tez naKHun

uqab ke panja-ha-e-KHunin

ki tarah aankhon pe aa rahe hain

gulab se tan misal-e-bismil

zamin par tilmila rahe hain

jo pyas pani ki muntazir thi

wo suliyon par Tangi hui hai

wo bhuk roTi jo mangti thi

salib-e-zar par chaDhi hui hai

ye zulm kaisa, sitam ye kya hai

main sochta hun ye kya junun hai

jahan mein nan-e-jawin ki qimat

kisi ki ismat, kisi ka KHun hai

tumhin batao mere azizo

mere rafiqo, tumhin batao

ye zindagi para para kyun hai

hamari pyari hasin zamin par

ye qatl-gah ka nazara kyun hai

mujhe batao ki aaj kaise

siyah barud ki lakiren

kaTile kajal, sajile surme

ke bankpan se ulajh gai hain

KHizan ke kanTon ki ungliyan kyun

har ek chaman se ulajh gai hain

mujhe batao lahu ne kaise

hina ke jadu ko dho diya hai

hayat ke pairahan ko insan

ke aansuon ne bhigo diya hai

bata sako to mujhe batao

ki saz naghmon se kyun hain ruThe

bata sako to mujhe batao

ki tar kyun paD gae hain jhuTe

mere azizo, mare rafiqo

meri communism kuchh nahin hai

ye ahd-e-hazir ki aabru hai

meri communism kuchh nahin hai

ye ahd-e-hazir ki aabru hai

meri communism zindagi ko

hasin banane ki aarzu hai

ye ek masum justuju hai

tumhaare dil mein bhi shayad aisi

koi jawan-sal aarzu ho

koi ubalti hui surahi

koi mahakta hua subu ho

zara ye samjho mere azizo

mere rafiqo zara ye socho

tumhaare qabze mein kya nahin hai

tumhaari Thokar se jag uThegi

tumhaare qadmon mein jo zamin hai

bas ek itni kami hai yaro

ki zauq begana-e-yaqin hai

tumhaari aankhon hi mein hai sab kuchh

tumhaari aankhon mein sab jahan hai

tumhaari palkon ke niche dharti

tumhaari palkon par aasman hai

tumhaare hathon ki jumbihson mein

hai ju-e-rang-e-bahaar dekho

na dekho is be-sutun-e-gham ko

tum apne teshon ki dhaar dekho

tum apne teshe uTha ke lao

main le ke apni kudal niklun

hazar-ha sal ke masaib

hazar-ha sal ke mazalim

jo ruh o dil par pahaD ban kar

hazar-ha sal se dhare hain

hum apne teshon ki zarb-e-kari

se un ke sinon ko chhed Dalen

ye hai sirf ek shab ki mehnat

jo ahd kar len to hum sahar tak

hayat-e-nau ke nae ajanta

nae ellora tarash Dalen