mere KHwab mujhe lauTa do

jashn-e-āzādī mubārak ho tujhe arz-e-vatan

jashn-e-āzādī tujhe merā salām

yaad haiñ mujh ko abhī

apne bachpan kī vo raushan sub.heñ

jashn-e-āzādī ke shādāñ manzar

saare vo hubb-e-vatan ke naġhme

jin ke āhang pe āñkhoñ meñ diye jalte the

jin ke har lafz pe īqān huā kartā thā

īmān huā kartā thā

jashn-e-āzādī maiñ qurbān tirī azmat ke

aur kuchh tujh se nahīñ māñgtī maiñ

bas mire ḳhvāb mujhe lauTā de

vo umīdoñ kī virāsat mire tābinda ḳhvāb

vo kahīñ

be-yaqīnī kī ghanī dhund meñ kho.e hue haiñ

jo kabhī mere buzurgoñ ne mujhe sauñpe the

amn-e-ālam ke mohabbat ke ravādārī ke ḳhvāb

aam insān kī azmat ke vafādārī ke ḳhvāb

ik na.e daur kī tayyārī ke ḳhvāb

ai mirī arz-e-vatan

mujh ko lauTā de vahī

mere purkhoñ kī virāsat vahī raḳhshanda ḳhvāb

taaki maiñ apnī na.ī nasl ko bhī

un kī amānat sauñpūñ

un kī āñkhoñ meñ sajā duuñ

vo ḳhush-ā.inda ḳhvāb

jashn-e-azadi mubarak ho tujhe arz-e-watan

jashn-e-azadi tujhe mera salam

yaad hain mujh ko abhi

apne bachpan ki wo raushan subhen

jashn-e-azadi ke shadan manzar

sare wo hubb-e-watan ke naghme

jin ke aahang pe aankhon mein diye jalte the

jin ke har lafz pe iqan hua karta tha

iman hua karta tha

jashn-e-azadi main qurban teri azmat ke

aur kuchh tujh se nahin mangti main

bas mere KHwab mujhe lauTa de

wo umidon ki wirasat mere tabinda KHwab

wo kahin

be-yaqini ki ghani dhund mein khoe hue hain

jo kabhi mere buzurgon ne mujhe saunpe the

amn-e-alam ke mohabbat ke rawadari ke KHwab

aam insan ki azmat ke wafadari ke KHwab

ek nae daur ki tayyari ke KHwab

ai meri arz-e-watan

mujh ko lauTa de wahi

mere purkhon ki wirasat wahi raKHshanda KHwab

taki main apni nai nasl ko bhi

un ki amanat saunpun

un ki aankhon mein saja dun

wo KHush-ainda KHwab