mere liye kaun sochta hai

mire liye kaun sochtā hai

judā judā haiñ mire qabīle ke log saare

judā judā sab kī sūrateñ haiñ

sabhī ko apnī anā ke andhe kueñ kī tah meñ paḌe hue

ḳhvāhishoñ ke pinjar

havas ke TukḌe

havās reze

hirās kañkar talāshnā haiñ

sabhī ko apne badan kī shah-e-rag meñ

qatra qatra lahū kā laavā uñDelnā hai

sabhī ko guzre dinoñ ke dariyā kā dukh

virāsat meñ jhelnā hai

mire liye kaun sochtā hai

sabhī kī apnī zarūrateñ haiñ

mirī rageñ chhiltī jarāhat ko kaun baḳhshe

shifā kī shabnam

mirī udāsī ko kaun bahlā.e

kisī ko fursat hai mujh se pūchhe

ki merī āñkheñ gulāb kyuuñ haiñ

mirī mashaqqat kī shāḳh-e-uriyāñ par

sāzishoñ ke azaab kyuuñ haiñ

mirī hathelī pe ḳhvāb kyuuñ haiñ

mire safar meñ sarāb kyuuñ haiñ

mire liye kaun sochtā hai

sabhī ke dil meñ kudūrateñ haiñ

mere liye kaun sochta hai

juda juda hain mere qabile ke log sare

juda juda sab ki suraten hain

sabhi ko apni ana ke andhe kuen ki tah mein paDe hue

KHwahishon ke pinjar

hawas ke TukDe

hawas reze

hiras kankar talashna hain

sabhi ko apne badan ki shah-e-rag mein

qatra qatra lahu ka lawa unDelna hai

sabhi ko guzre dinon ke dariya ka dukh

wirasat mein jhelna hai

mere liye kaun sochta hai

sabhi ki apni zaruraten hain

meri ragen chhilti jarahat ko kaun baKHshe

shifa ki shabnam

meri udasi ko kaun bahlae

kisi ko fursat hai mujh se puchhe

ki meri aankhen gulab kyun hain

meri mashaqqat ki shaKH-e-uriyan par

sazishon ke azab kyun hain

meri hatheli pe KHwab kyun hain

mere safar mein sarab kyun hain

mere liye kaun sochta hai

sabhi ke dil mein kuduraten hain