مرے ندیم

اب ٹوٹ بھی چکے مرا ساغر ترا رباب

اب قہقہے لگائے گی ظلمت مرے ندیم

قلب تپاں سے آئی ہے کتنی اداس آنچ

شعلوں پہ سو گئی ہے محبت مرے ندیم

کتنا بدل گیا ہوں مگر کس طرح کہوں

آتی ہے اب بھی روز قیامت مرے ندیم

پھر بجھ گئے چراغ مرے آنسوؤں کے آج

آنکھوں میں کھو گئی ہے صداقت مرے ندیم

ان قہقہوں میں گم ہے مری زندگی کا راز

جیسے بھلا چکا ہوں محبت مرے ندیم

بس اک فریب کاریٔ الفت سہی مگر

کچھ دور بھی نہیں ہے حقیقت مرے ندیم