مرے ساتھ چل

اے حیات نو کے پیامبر

مرے ساتھ چل مرے ساتھ چل

میں ہوں ہم قدم تری ہم سفر

مرے ساتھ چل مرے ساتھ چل

میں نشاط شام و سحر بھی ہوں

میں حیات شاخ و ثمر بھی ہوں

اے مرے وجود سے بے خبر

مرے ساتھ چل مرے ساتھ چل

تو ہی کارواں کا امین ہے

ترے ساتھ میرا یقین ہے

تو ہی حکمراں تو ہی راہبر

مرے ساتھ چل مرے ساتھ چل

ترے نقش پا کی اسیر ہے

تری منزلوں کی سفیر ہے

مری فکر اور مری نظر

مرے ساتھ چل مرے ساتھ چل

نئے موڑ راہوں میں آ گئے

نئی کشمکش کو جگا گئے

مری منزلوں کو تلاش کر

مرے ساتھ چل مرے ساتھ چل

ہیں نئے افق نئے آسماں

ہے چمن نیا نیا آشیاں

تو سنوار دے مرے بال و پر

مرے ساتھ چل مرے ساتھ چل

مرے دل میں خوف جہاں بھی ہے

ہے یقین کچھ تو گماں بھی ہے

ابھی طرز نو سے ہوں بے خبر

مرے ساتھ چل مرے ساتھ چل

نیا نور چشم فلک میں ہے

نئی آب شمس و قمر میں ہے

ہوئی خیرہ خیرہ مری نظر

مرے ساتھ چل مرے ساتھ چل

میں سوال ہوں تو جواب دے

مری زندگی کا حساب دے

کیوں وفائیں میری ہیں بے اثر

مرے ساتھ چل مرے ساتھ چل

مرا ناخدا ہے خدا نہیں

تری ہم قدم ہوں گدا نہیں

مری بے بسی کو تمام کر

مرے ساتھ چل مرے ساتھ چل