mere sone ki

mire sone kī

aur bedār hone kī

mire jiine kī marne kī

mire hone na hone kī

faqat ye hī nahīñ

in meñ hī

kal ke ḳhvāb ugte haiñ

ye vo tasvīr haiñ

jis meñ ga.e vaqtoñ kā

ik ik pal munaqqash hai

ye āñkheñ haiñ

zamānī aur makānī

manzaroñ kī kitnī

rūdādeñ

zabān-o-dast

aurāq-o-qalam

jin ko bayāñ

kar hī nahīñ sakte

basā letī haiñ

shīshoñ meñ

chhalakte se kaToroñ meñ

jinheñ shā.ir ne

dī tashbīh

jhīloñ se

kabhī mai ke piyāloñ se

kabhī nargis ke phūloñ se

sitāroñ se

kabhī muTThī se nikle

jagmagāte jugnūoñ se

magar in kī tahoñ kī

daldalī jhīloñ meñ

jo tūfāñ chhupe haiñ

vo an-dekhe hī rahte haiñ

khulī haiñ to jahāñ ābād hai

bikhrā huā hai

agar haiñ band to

hastī kī saarī dāstāñ

simTī huī hai

mere sone ki

aur bedar hone ki

mere jine ki marne ki

mere hone na hone ki

faqat ye hi nahin

in mein hi

kal ke KHwab ugte hain

ye wo taswir hain

jis mein gae waqton ka

ek ek pal munaqqash hai

ye aankhen hain

zamani aur makani

manzaron ki kitni

rudaden

zaban-o-dast

auraq-o-qalam

jin ko bayan

kar hi nahin sakte

basa leti hain

shishon mein

chhalakte se kaToron mein

jinhen shair ne

di tashbih

jhilon se

kabhi mai ke piyalon se

kabhi nargis ke phulon se

sitaron se

kabhi muTThi se nikle

jagmagate jugnuon se

magar in ki tahon ki

daldali jhilon mein

jo tufan chhupe hain

wo an-dekhe hi rahte hain

khuli hain to jahan aabaad hai

bikhra hua hai

agar hain band to

hasti ki sari dastan

simTi hui hai