meri aawaz sunte ho

maiñ tanhā hijr ke jañgal ke ġhāroñ meñ

jalātī huuñ

suḳhan ke vo diye jin ko

abhī bāhar kī zahrīlī havā.eñ ajnabī mahsūs kartī haiñ

abhī ye raushnī jo sach kī ḳhushbū kī hifāzat ke liye

tārīkiyoñ se laḌ rahī hai, nā-shanāsī ke

ġhubār-ālūd rastoñ se guzartī hai

abhī jugnū shaboñ meñ apne hone kī gavāhī tak nahīñ dete

abhī to titliyāñ maile paroñ se dar-ba-dar phirtī haiñ be-chārī

abhī to chāñd bhī ThanDak nahīñ detā mohabbat kī

abhī to raat ke shānoñ pe haiñ hālāt kī zulfeñ

mujhe ma.alūm hai maiñ jāntī huuñ mujh ko rahnā hai

isī ġhār-e-aziyyat meñ

magar sun lo

yahīñ se mere hoñToñ ko milā hai vasf-e-goyā.ī

yahīñ se mere hoñToñ ko milā hai vasf-e-goyā.ī

yahīñ se maiñ ne sach kī raushnī ḳhud meñ utārī hai

isī ġhār-e-aziyyat ne mire lafzoñ ko āvāzeñ atā kī haiñ

yahīñ se ek din sūraj nikalnā hai vafāoñ kā

yahīñ se ek din harf-e-mohabbat bhī janam legā

mire lafzoñ meñ ma.anī kā asar mahsūs karte ho

mirī āvāz sunte ho

main tanha hijr ke jangal ke ghaaron mein

jalati hun

suKHan ke wo diye jin ko

abhi bahar ki zahrili hawaen ajnabi mahsus karti hain

abhi ye raushni jo sach ki KHushbu ki hifazat ke liye

tarikiyon se laD rahi hai, na-shanasi ke

ghubar-alud raston se guzarti hai

abhi jugnu shabon mein apne hone ki gawahi tak nahin dete

abhi to titliyan maile paron se dar-ba-dar phirti hain be-chaari

abhi to chand bhi ThanDak nahin deta mohabbat ki

abhi to raat ke shanon pe hain haalat ki zulfen

mujhe malum hai main jaanti hun mujh ko rahna hai

isi ghaar-e-aziyyat mein

magar sun lo

yahin se mere honTon ko mila hai wasf-e-goyai

yahin se mere honTon ko mila hai wasf-e-goyai

yahin se main ne sach ki raushni KHud mein utari hai

isi ghaar-e-aziyyat ne mere lafzon ko aawazen ata ki hain

yahin se ek din suraj nikalna hai wafaon ka

yahin se ek din harf-e-mohabbat bhi janam lega

mere lafzon mein mani ka asar mahsus karte ho

meri aawaz sunte ho