meri gali ke ghaliz bachcho

mirī galī ke ġhalīz bachcho

tum apne maile badan kī saarī ġhalāzatoñ ko udhār samjho

tumhārī āñkheñ

udāsiyoñ se bharī huī haiñ

azal se jaise Darī huī haiñ

tumhāre hoñToñ pe pīḌhiyoñ kī jamī huī tah ye kah rahī hai

hayāt kī aabjū pas-e-pusht bah rahī hai

tumhārī jebeñ munāfiqat se aTī huī haiñ

sabhī qamīseñ phaTī huī haiñ

tumhārī phīkī hatheliyoñ kī bujhī lakīreñ

baqā kī abjad se ajnabī haiñ

tumhārī qismat kī āsmānī nishāniyāñ ab ḳhutūt-e-vahdāniyat kā maqsūm ho rahī haiñ

nazar se mādūm ho rahī haiñ

mirī galī ke ġhalīz bachcho

tumhāre māñ-bāp ne tamaddun kā qarz le kar

tumhārī tahzīb bech dī hai

tumhārā ustād apnī TuuTī huī chhaḌī le ke chup khaḌā hai

ki is ke sūkhe gale meñ nān-e-javīñ kā TukḌā aḌā huā hai

mirī galī ke ġhalīz bachcho

tumhāre maile badan kī saarī ġhalāzateñ ab ga.e zamānoñ ke armuġhāñ haiñ

tumhāre virse kī dāstāñ haiñ

inheñ sambhālo

ki aane vaalā har ek lamha tumhāre jhaḌte hue papoToñ se jaane vaale dinoñ dinoñ kī utaar legā

mirī galī ke ġhalīz bachcho

zidoñ ko chhoḌo

qarīb aao

rutoñ kī nafrat ko pyaar samjho

ḳhizāñ ko rang-e-bahār samjho

ġhalāzatoñ ko udhār samjho

meri gali ke ghaliz bachcho

tum apne maile badan ki sari ghalazaton ko udhaar samjho

tumhaari aankhen

udasiyon se bhari hui hain

azal se jaise Dari hui hain

tumhaare honTon pe piDhiyon ki jami hui tah ye kah rahi hai

hayat ki aabju pas-e-pusht bah rahi hai

tumhaari jeben munafiqat se aTi hui hain

sabhi qamisen phaTi hui hain

tumhaari phiki hatheliyon ki bujhi lakiren

baqa ki abjad se ajnabi hain

tumhaari qismat ki aasmani nishaniyan ab KHutut-e-wahdaniyat ka maqsum ho rahi hain

nazar se madum ho rahi hain

meri gali ke ghaliz bachcho

tumhaare man-bap ne tamaddun ka qarz le kar

tumhaari tahzib bech di hai

tumhaara ustad apni TuTi hui chhaDi le ke chup khaDa hai

ki is ke sukhe gale mein nan-e-jawin ka TukDa aDa hua hai

meri gali ke ghaliz bachcho

tumhaare maile badan ki sari ghalazaten ab gae zamanon ke armughan hain

tumhaare wirse ki dastan hain

inhen sambhaalo

ki aane wala har ek lamha tumhaare jhaDte hue papoTon se jaane wale dinon dinon ki utar lega

meri gali ke ghaliz bachcho

zidon ko chhoDo

qarib aao

ruton ki nafrat ko pyar samjho

KHizan ko rang-e-bahaar samjho

ghalazaton ko udhaar samjho