mirza-ghaalib

rāzdān-e-zindagī ai tarjumān-e-zindagī

hai tirā har lafz zinda dāstān-e-zindagī

har tabassum se tire paidā fuġhān-e-zindagī

har fuġhāñ terī nashīd-e-gulsitān-e-zindagī

gulshan-e-husn-o-vafā kī ābiyārī tujh se hai

ḳhaak ke zarroñ ko faḳhr-e-tāj-dārī tujh se hai

daur-e-mustaqbil pe duniyā ke nigāheñ thiiñ tirī

rahbar-e-rāh-e-amal dil-doz aaheñ thiiñ tirī

sīna-e-ilm-e-haqīqat meñ panāheñ thiiñ tirī

arsh se bhī aur aage jalva-gāheñ thiiñ tirī

kaam thā tujh ko na mutlaq hasti-e-nākām se

thī navā vābasta terī parda-e-ilhām se

falsafe kī ḳhūbsūrat tarjumānī tū ne kī

dasht-e-hū meñ āñsuoñ se bāġhbānī tū ne kī

apnī āñkhoñ se musalsal ḳhūñ-fishānī tū ne kī

muddatoñ mulk-e-suḳhan par hukmarānī tū ne kī

ruuh mutlaq jazb thī goyā tire ehsās meñ

quds ke naġhme nihāñ the parda-e-anfās meñ

nutq ko tū ne diyā pairāya-e-soz-o-gudāz

ḳhuun se kar ke vuzū tū ne paḌhī aksar namāz

guuñj uTThā tere naġhmoñ se harīm-e-hsun-o-nāz

aaj tak mahfūz hai har dil meñ terā soz-o-sāz

ālam-e-bālā se ik paiġhām-e-nau laatā thā tū

ruuh kī gahrā.iyoñ tak us ko pahuñchātā thā tū

mai-kada thā terā yaksar soz mutlaq saaz bhī

thī mai-a-hindī bhī sāġhar meñ mai-e-shīrāz bhī

tū haqīqat fahm bhī thā āshnā-e-rāz bhī

ruuh kī āvāz thī goyā tirī āvāz bhī

naqsh-e-faryādī hai terī shoḳhi-e-tahrīr kā

kāġhzī hai pairahan har paikar-e-tasvīr kā

aah ḳhāk-e-hind meñ tū der se ḳhvābīda hai

zīnat-e-har-bazm terā jalva-e-nā-dīda hai

tere ġham meñ aaj bhī jān-e-suḳhan kāhīda hai

hai tasarruf terā paidā aur tū poshīda hai

soz terā aag ban kar bazm par chhā jā.egā

sāz-e-hastī hashr tak tere hī naġhme gā.egā

raazdan-e-zindagi ai tarjuman-e-zindagi

hai tera har lafz zinda dastan-e-zindagi

har tabassum se tere paida fughan-e-zindagi

har fughan teri nashid-e-gulsitan-e-zindagi

gulshan-e-husn-o-wafa ki aabiyari tujh se hai

KHak ke zarron ko faKHr-e-taj-dari tujh se hai

daur-e-mustaqbil pe duniya ke nigahen thin teri

rahbar-e-rah-e-amal dil-doz aahen thin teri

sina-e-ilm-e-haqiqat mein panahen thin teri

arsh se bhi aur aage jalwa-gahen thin teri

kaam tha tujh ko na mutlaq hasti-e-nakaam se

thi nawa wabasta teri parda-e-ilham se

falsafe ki KHubsurat tarjumani tu ne ki

dasht-e-hu mein aansuon se baghbani tu ne ki

apni aankhon se musalsal KHun-fishani tu ne ki

muddaton mulk-e-suKHan par hukmarani tu ne ki

ruh mutlaq jazb thi goya tere ehsas mein

quds ke naghme nihan the parda-e-anfas mein

nutq ko tu ne diya pairaya-e-soz-o-gudaz

KHun se kar ke wuzu tu ne paDhi aksar namaz

gunj uTTha tere naghmon se harim-e-hsun-o-naz

aaj tak mahfuz hai har dil mein tera soz-o-saz

aalam-e-baala se ek paigham-e-nau lata tha tu

ruh ki gahraiyon tak us ko pahunchata tha tu

mai-kada tha tera yaksar soz mutlaq saz bhi

thi mai-a-hindi bhi saghar mein mai-e-shiraaz bhi

tu haqiqat fahm bhi tha aashna-e-raaz bhi

ruh ki aawaz thi goya teri aawaz bhi

naqsh-e-faryaadi hai teri shoKHi-e-tahrir ka

kaghzi hai pairahan har paikar-e-taswir ka

aah KHak-e-hind mein tu der se KHwabida hai

zinat-e-har-bazm tera jalwa-e-na-dida hai

tere gham mein aaj bhi jaan-e-suKHan kahida hai

hai tasarruf tera paida aur tu poshida hai

soz tera aag ban kar bazm par chha jaega

saz-e-hasti hashr tak tere hi naghme gaega