mister koi nahin

kis ne girā kar mez se toḌā shīshe kā gul-dān

kis ne pīkoñ se dīvāreñ rang diiñ khā kar paan

kis ne saare ghar meñ phailā rakkhe haiñ ye dhaan

kis ne toḌ ke pheñke mere saare tiir kamān

mister koī nahīñ ye bole ham ko kyā ma.alūm

kis ne churā.e mīThe mīThe abbā jī ke aam

kis ne uḌāyā chupke chupke ammāñ bī kā jaam

kis ne khaa.e is Dabbe ke patte aur bādām

kis ne miTāyā copy ke is varq se merā naam

mister koī nahīñ ye bole ham ko kyā ma.alūm

kis ne munnī ko rulvāyā khīñch ke us ke baal

maar ke thappaḌ be-chārī ko kis ne sujā.e gaal

kis ne is gharve kā mere haal kiyā behāl

toḌ ke merī guḌiyā ko ye kis ne kiyā pāmāl

mister koī nahīñ ye bole ham ko kyā ma.alūm

haa.e haa.e kis ne machāyā ghar meñ ye andher

mere khilaune saare toḌe ghoḌā murġhā sher

kis ne lagāyā phaaḌ ke itne kapḌoñ kā ye Dher

khaa.e āḳhir kis ne mere seb anaar aur ber

mister koī nahīñ ye bole ham ko kyā ma.alūm

kis ne chhue haiñ be-pūchhe ye naanā ke hathiyār

kis ne nikālī almārī se un kī na.ī talvār

kis ne toḌe is kamre kī bijlī ke sab taar

le kar chaltā kaun banā daddy kī baby car

mister koī nahīñ ye bole ham ko kyā ma.alūm

kis ne gira kar mez se toDa shishe ka gul-dan

kis ne pikon se diwaren rang din kha kar pan

kis ne sare ghar mein phaila rakkhe hain ye dhan

kis ne toD ke phenke mere sare tir kaman

mister koi nahin ye bole hum ko kya malum

kis ne churae miThe miThe abba ji ke aam

kis ne uDaya chupke chupke amman bi ka jam

kis ne khae is Dabbe ke patte aur baadam

kis ne miTaya copy ke is warq se mera nam

mister koi nahin ye bole hum ko kya malum

kis ne munni ko rulwaya khinch ke us ke baal

mar ke thappaD be-chaari ko kis ne sujae gal

kis ne is gharwe ka mere haal kiya behaal

toD ke meri guDiya ko ye kis ne kiya pamal

mister koi nahin ye bole hum ko kya malum

hae hae kis ne machaya ghar mein ye andher

mere khilaune sare toDe ghoDa murgha sher

kis ne lagaya phaD ke itne kapDon ka ye Dher

khae aaKHir kis ne mere seb anar aur ber

mister koi nahin ye bole hum ko kya malum

kis ne chhue hain be-puchhe ye nana ke hathiyar

kis ne nikali almari se un ki nai talwar

kis ne toDe is kamre ki bijli ke sab tar

le kar chalta kaun bana daddy ki baby car

mister koi nahin ye bole hum ko kya malum