مٹی

جس جگہ کی ہو بے وفا مٹی

اس جگہ سے مری اٹھا مٹی

ایک دن خود بہ خود یہ ہونا ہے

تو تو مٹی میں مت ملا مٹی

جانے کس کس طرح ملے بچھڑے

آگ پانی فلک ہوا مٹی

رنگ اور نسل کی تمیز غلط

آدمی اصل میں ہے کیا مٹی

ہم سدا جاں پہ کھیل جاتے ہیں

ہم کو دیتی ہے جب صدا مٹی

سجدہ کرنے کو دل ترستا ہے

لا وطن کی وطن سے لا مٹی

کیسی مردہ پرست ہے دنیا

مر کے پاتی ہے مرتبہ مٹی

سب پہ حق اس کا سب پہ قرض اس کا

جانے کب کس کو لے بلا مٹی

روتی ہنستی ہے چلتی پھرتی ہے

کتنے رنگوں میں جا بجا مٹی

روندتا ہے کمہار مٹی کو

اس کو روندے گی دیکھنا مٹی

جس کو ہم نے عزیز تر جانا

سب سے پہلے وہ دے گیا مٹی

اپنے اندر چھپائے بیٹھی ہے

ساری دنیا کا فلسفہ مٹی

یہ کہیں پر ہے ڈھیر بے معنی

اور کہیں پر ہے کیمیا مٹی