miTTi ka diya

jhuTpuTe ke vaqt ghar se ek miTTī kā diyā

ek buḌhiyā ne sar-e-rah lā ke raushan kar diyā

taaki rah-gīr aur pardesī kahīñ Thokar na khā.eñ

raah se āsāñ guzar jaa.e har ek chhoTā baḌā

ye diyā behtar hai un jhāḌoñ se aur us lamp se

raushnī mahloñ ke andar hī rahī jin kī sadā

gar nikal kar ik zarā mahloñ se bāhar dekhiye

hai añdherā ghup dar-o-dīvār par chhāyā huā

surḳh-rū āfāq meñ vo rahnumā mīnār haiñ

raushnī se jin kī mallāhoñ ke beḌe paar haiñ

ham ne in aalī bināoñ se kiyā akasr savāl

āshkārā jin se un ke bāniyoñ kā hai jalāl

shān-o-shaukat kī tumhārī dhuum hai āfāq meñ

duur se aa aa ke tum ko dekhte haiñ bā-kamāl

qaum ko is shān-o-shaukat se tumhārī kyā milā

do javāb is kā agar rakhtī ho yārā-e-maqāl

sar-nigūñ ho kar vo sab bolīñ zabān-e-hāl se

ho sakā ham se na kuchh al-infi.āl al-infi.āl

bāniyoñ ne thā banāyā is liye goyā hameñ

ham ko jab dekheñ ḳhalaf aslāf ko royā kareñ

shauq se us ne banāyā maqbara ik shāndār

aur chhoḌā us ne ik aivān-e-ālī yādgār

ek ne duniyā ke paude baaġh meñ apne lagā.e

ek ne chhoḌe dafīne sīm-o-zar ke be-shumār

ik muhibb-e-qaum ne apne mubārak haath se

qaum kī ta.alīm kī buniyād Daalī ustuvār

hogī aalam meñ kaho sarsabz ye pichhlī murād

yā vo agloñ kī umīdeñ lā.eñgī kuchh barg-o-bār

chashma-e-sar jyuuñ hai jo bahtā rahegā yaañ vahī

sab utar jā.eñgī chaḌh chaḌh naddiyāñ barsāt kī

jhuTpuTe ke waqt ghar se ek miTTi ka diya

ek buDhiya ne sar-e-rah la ke raushan kar diya

taki rah-gir aur pardesi kahin Thokar na khaen

rah se aasan guzar jae har ek chhoTa baDa

ye diya behtar hai un jhaDon se aur us lamp se

raushni mahlon ke andar hi rahi jin ki sada

gar nikal kar ek zara mahlon se bahar dekhiye

hai andhera ghup dar-o-diwar par chhaya hua

surKH-ru aafaq mein wo rahnuma minar hain

raushni se jin ki mallahon ke beDe par hain

hum ne in aali binaon se kiya akasr sawal

aashkara jin se un ke baniyon ka hai jalal

shan-o-shaukat ki tumhaari dhum hai aafaq mein

dur se aa aa ke tum ko dekhte hain ba-kamal

qaum ko is shan-o-shaukat se tumhaari kya mila

do jawab is ka agar rakhti ho yara-e-maqal

sar-nigun ho kar wo sab bolin zaban-e-haal se

ho saka hum se na kuchh al-infial al-infial

baniyon ne tha banaya is liye goya hamein

hum ko jab dekhen KHalaf aslaf ko roya karen

shauq se us ne banaya maqbara ek shandar

aur chhoDa us ne ek aiwan-e-ali yaadgar

ek ne duniya ke paude bagh mein apne lagae

ek ne chhoDe dafine sim-o-zar ke be-shumar

ek muhibb-e-qaum ne apne mubarak hath se

qaum ki talim ki buniyaad Dali ustuwar

hogi aalam mein kaho sarsabz ye pichhli murad

ya wo aglon ki umiden laengi kuchh barg-o-bar

chashma-e-sar jyun hai jo bahta rahega yan wahi

sab utar jaengi chaDh chaDh naddiyan barsat ki