murgha banne ke fawaed

murġhā banñe ke favā.ed tibb meñ paa.e be-hisāb

maulvī ne is liye murġhe banā.e be-hisāb

murġhā banñe kā 'amal hotā nahīñ āsān bhī

murġhā banñe se sunā hai Dartā hai shaitān bhī

maulvī murġhā banāne meñ hamāre taaq haiñ

is hunar meñ mulk ke thāne bhī saare taaq haiñ

ḳhatm hotā jā rahā hai murġhā banñe kā rivāj

is liye bigḌā huā hai naujavānoñ kā mizāj

murġhā banñe se zahānat hote dekhī dhār-dār

murġhā banñe ke mile tibbī favā.ed be-shumār

murġhā banñe se hai TuuTā kaise kaisoñ kā ġhurūr

murġh banñe se anā bhī hote dekhī chaknā-chūr

kaise hoñ ham sāhib-e-īmān bin murġhā bane

hifz hotā hī nahīñ qur.ān bin murġhā bane

nusḳha donoñ ke liye hai piir ho vo yā murīd

murġhā khāne se ziyāda murġhā banñā hai mufīd

siina chauḌā bachchoñ kā aur peT ho jaatā hai kam

bachcha be-dam ho agar to us meñ aa jaatā hai dam

bhaag jaa.eñ murġhā ban jaane ke Dar se bhuut bhī

murġhā banñe se utar jaate haiñ sar se bhuut bhī

kitne bhī mushkil ho yaaro kitne bhī hoñ vo adaq

yaad murġhā banñe se ho jaate haiñ saare sabaq

shā'iroñ ke sar se utrā shā'irī kā bhuut bhī

ham ne dekhā hai utarte 'āshiqī kā bhuut bhī

murġhā banñe se hai miTtā har tarah kā iztirāb

murġhā banñe se hī aa.e murda chehroñ par shabāb

koī leader ho yā afsar kukḌūñkūñ kartā mile

sāmne biivī ke har shauhar yahāñ murġhā bane

jo bhī bachpan meñ banā murġhā huā hai kāmyāb

jo nahīñ ban paayā murġhā us kī qismat hai ḳharāb

murgha banne ke fawaed tibb mein pae be-hisab

maulwi ne is liye murghe banae be-hisab

murgha banne ka 'amal hota nahin aasan bhi

murgha banne se suna hai Darta hai shaitan bhi

maulwi murgha banane mein hamare taq hain

is hunar mein mulk ke thane bhi sare taq hain

KHatm hota ja raha hai murgha banne ka riwaj

is liye bigDa hua hai naujawanon ka mizaj

murgha banne se zahanat hote dekhi dhaar-dar

murgha banne ke mile tibbi fawaed be-shumar

murgha banne se hai TuTa kaise kaison ka ghurur

murgh banne se ana bhi hote dekhi chakna-chur

kaise hon hum sahib-e-iman bin murgha bane

hifz hota hi nahin quran bin murgha bane

nusKHa donon ke liye hai pir ho wo ya murid

murgha khane se ziyaada murgha banna hai mufid

sina chauDa bachchon ka aur peT ho jata hai kam

bachcha be-dam ho agar to us mein aa jata hai dam

bhag jaen murgha ban jaane ke Dar se bhut bhi

murgha banne se utar jate hain sar se bhut bhi

kitne bhi mushkil ho yaro kitne bhi hon wo adaq

yaad murgha banne se ho jate hain sare sabaq

sha'iron ke sar se utra sha'iri ka bhut bhi

hum ne dekha hai utarte 'ashiqi ka bhut bhi

murgha banne se hai miTta har tarah ka iztirab

murgha banne se hi aae murda chehron par shabab

koi leader ho ya afsar kukDunkun karta mile

samne biwi ke har shauhar yahan murgha bane

jo bhi bachpan mein bana murgha hua hai kaamyab

jo nahin ban paya murgha us ki qismat hai KHarab