مرغا بننے کے فوائد

مرغا بننے کے فوائد طب میں پائے بے حساب

مولوی نے اس لئے مرغے بنائے بے حساب

مرغا بننے کا عمل ہوتا نہیں آسان بھی

مرغا بننے سے سنا ہے ڈرتا ہے شیطان بھی

مولوی مرغا بنانے میں ہمارے طاق ہیں

اس ہنر میں ملک کے تھانے بھی سارے طاق ہیں

ختم ہوتا جا رہا ہے مرغا بننے کا رواج

اس لئے بگڑا ہوا ہے نوجوانوں کا مزاج

مرغا بننے سے ذہانت ہوتے دیکھی دھار دار

مرغا بننے کے ملے طبی فوائد بے شمار

مرغا بننے سے ہے ٹوٹا کیسے کیسوں کا غرور

مرغ بننے سے انا بھی ہوتے دیکھی چکنا چور

کیسے ہوں ہم صاحب ایمان بن مرغا بنے

حفظ ہوتا ہی نہیں قرآن بن مرغا بنے

نسخہ دونوں کے لئے ہے پیر ہو وہ یا مرید

مرغا کھانے سے زیادہ مرغا بننا ہے مفید

سینہ چوڑا بچوں کا اور پیٹ ہو جاتا ہے کم

بچہ بے دم ہو اگر تو اس میں آ جاتا ہے دم

بھاگ جائیں مرغا بن جانے کے ڈر سے بھوت بھی

مرغا بننے سے اتر جاتے ہیں سر سے بھوت بھی

کتنے بھی مشکل ہو یارو کتنے بھی ہوں وہ ادق

یاد مرغا بننے سے ہو جاتے ہیں سارے سبق

شاعروں کے سر سے اترا شاعری کا بھوت بھی

ہم نے دیکھا ہے اترتے عاشقی کا بھوت بھی

مرغا بننے سے ہے مٹتا ہر طرح کا اضطراب

مرغا بننے سے ہی آئے مردہ چہروں پر شباب

کوئی لیڈر ہو یا افسر ککڑوں کوں کرتا ملے

سامنے بیوی کے ہر شوہر یہاں مرغا بنے

جو بھی بچپن میں بنا مرغا ہوا ہے کامیاب

جو نہیں بن پایا مرغا اس کی قسمت ہے خراب