mohabbat ka aaKHiri saeban

ret bharī havā.eñ chīrtī haiñ dil ke zaḳhmoñ ko

TuuT jaatī haiñ zanjīreñ sāñsoñ kī

kis qadar barham hai ye ġhasīlī havā

ai merī mohabbat ke āḳhirī sā.ebān

mujhe le chal kisī aise sāhil samundar par

jahāñ maiñ dil kā ġhubār dho sakūñ

saffāk manzar kī daldal āñkhoñ ke ā.īne se utar jaa.e

maiñ bhāgtī rahūñ der tak

duur tak yahāñ tak ki munhadim hote shahr kī dastaras se nikal jā.ūñ

sabhī yādoñ aur va.adoñ ko kuchalte hue

dil aur zehn kī ālūdgī meñ luThḌe hue shahr se duur

ek sabz jañgal hai

jahāñ aman aur mohabbat ke giit gungunātī huī havā

mujhe bulā rahī hai

merī ruuh ko āsūdgī kā resham oḌhāne ke liye

ret bhari hawaen chirti hain dil ke zaKHmon ko

TuT jati hain zanjiren sanson ki

kis qadar barham hai ye ghasili hawa

ai meri mohabbat ke aaKHiri saeban

mujhe le chal kisi aise sahil samundar par

jahan main dil ka ghubar dho sakun

saffak manzar ki daldal aankhon ke aaine se utar jae

main bhagti rahun der tak

dur tak yahan tak ki munhadim hote shahr ki dastaras se nikal jaun

sabhi yaadon aur wadon ko kuchalte hue

dil aur zehn ki aaludgi mein luThDe hue shahr se dur

ek sabz jangal hai

jahan aman aur mohabbat ke git gungunati hui hawa

mujhe bula rahi hai

meri ruh ko aasudgi ka resham oDhane ke liye