mohabbat ka faqir

aisī tanhā.ī ki ghar dasht lage

aisā sannāTā agar patta hile

aañkh darvāze kī aahaT pe jā ke ruk jaa.e

kaash aa jaa.e koī

phir mohabbat kā safīr

merī anjān sī chāhat kā asiir

vo jo aa jaa.e to āñgan meñ sitāre aa jaa.eñ

is makāñ meñ bhī ki jis meñ tanhā

rah rahā huuñ maiñ ka.ī sadiyoñ se

aane vaale ke muqaddar ke tufail

merī manzil mirā ghar mere kināre aa jaa.eñ

jab bhī is ālam-e-kam-hoshī meñ

dastak-e-dil se aañkh khul jaa.e

ghar kī dahlīz par Thahar jaa.e

duur ik saaya sā nazar aa.e

dil ye phir baar baar samjhā.e

haañ abhī bas abhī aatā hogā

merī jānib bhī koī

sirf mohabbat kā safīr

merī chāhat kā asiir

jab bhī aahaT sī koī hotī hai

aur phir ḳhud ko 'adīl'

dastak-e-dil ke udhar

tanhā khaḌā paatā huuñ

aur mirā aks

mire apne hī ā.īne meñ

Thahre hue paanī meñ

har sub.h mujh ko nazar aatā hai

rose ye samjhātā hai

merī dahlīz pe koī bhī nahīñ

bas meñ huuñ

ek anjān sī chāhat kā safīr

ek gumnām mohabbat kā faqīr

aisi tanhai ki ghar dasht lage

aisa sannaTa agar patta hile

aankh darwaze ki aahaT pe ja ke ruk jae

kash aa jae koi

phir mohabbat ka safir

meri anjaan si chahat ka asir

wo jo aa jae to aangan mein sitare aa jaen

is makan mein bhi ki jis mein tanha

rah raha hun main kai sadiyon se

aane wale ke muqaddar ke tufail

meri manzil mera ghar mere kinare aa jaen

jab bhi is aalam-e-kam-hoshi mein

dastak-e-dil se aankh khul jae

ghar ki dahliz par Thahar jae

dur ek saya sa nazar aae

dil ye phir bar bar samjhae

han abhi bas abhi aata hoga

meri jaanib bhi koi

sirf mohabbat ka safir

meri chahat ka asir

jab bhi aahaT si koi hoti hai

aur phir KHud ko 'adil'

dastak-e-dil ke udhar

tanha khaDa pata hun

aur mera aks

mere apne hi aaine mein

Thahre hue pani mein

har subh mujh ko nazar aata hai

rose ye samjhata hai

meri dahliz pe koi bhi nahin

bas mein hun

ek anjaan si chahat ka safir

ek gumnam mohabbat ka faqir