mohabbat ka marqad

ek roz sūraj tulūa nahīñ hogā

kyūñki maiñ mar chukī hūñgī

ek roz raat siyāh sayyāl ban kar mere halaq se utar jā.egī

kyūñki maiñ mar chukī hoñgī

ek roz shaam din aur raat ke darmiyān hijr ban kar Thahar jā.egī

kyūñki us roz maiñ shaam ban jā.ūñgī

ek roz saare zaḳhmī ḳhvāb mil kar gungunā.eñge

aur maiñ is lorī se so jā.ūñgī

ek roz sab ḳhushbuoñ ko habs chaaT jā.egā

aur phir ye habs jumūd ban kar mere tanaffus meñ qiyām karegā

ek roz tum uThoge

aur tumhārī dahlīz ḳhākī lifāfe ke vajūd se ḳhālī hogī

us roz havā tumhārī khiḌkī ke namnāk shīshe par koī bosa nahīñ chhoḌegī

tumhārī chaa.e kī chāshnī ThanDī talḳhī meñ ġharqāb ho jā.egī

sah-pahar ke lambe saa.e bad-rūheñ ban kar tumhārī vīrān rāh-darī ke sutūnoñ ko thaam leñge

aur raat syaah harrafa ban kar tumheñ daboch legī

kyūñki maiñ mar chukī hoñgī

ek roz suraj tulua nahin hoga

kyunki main mar chuki hungi

ek roz raat siyah sayyal ban kar mere halaq se utar jaegi

kyunki main mar chuki hongi

ek roz sham din aur raat ke darmiyan hijr ban kar Thahar jaegi

kyunki us roz main sham ban jaungi

ek roz sare zaKHmi KHwab mil kar gungunaenge

aur main is lori se so jaungi

ek roz sab KHushbuon ko habs chaT jaega

aur phir ye habs jumud ban kar mere tanaffus mein qiyam karega

ek roz tum uThoge

aur tumhaari dahliz KHaki lifafe ke wajud se KHali hogi

us roz hawa tumhaari khiDki ke namnak shishe par koi bosa nahin chhoDegi

tumhaari chae ki chashni ThanDi talKHi mein gharqab ho jaegi

sah-pahar ke lambe sae bad-ruhen ban kar tumhaari viran rah-dari ke sutunon ko tham lenge

aur raat syah harrafa ban kar tumhein daboch legi

kyunki main mar chuki hongi