mohabbat ka shiwala

haq baat hai is daur meñ taḳhrīb-pasandī

bātil kī satā.ish meñ hai insāñ kī bulandī

tā.īd-e-sitam sheva-e-arbāb-e-hunar hai

zindān-o-rasan martaba-e-ahl-e-nazar hai

mujrim haiñ jo zulmat ko ujālā nahīñ kahte

maqtal ko mohabbat kā shivāla nahīñ kahte

āzādī-e-afkār kī sham.eñ na jalāo

ārā.ish-e-zindāñ ke liye ḳhuun bahāo

iz.hār-e-karam ḳhauf ke phūloñ se kiyā jaa.e

raushan rah-e-hastī ko bagūloñ se kiyā jaa.e

ā.īn-e-chaman zulm-o-sitam kā hai nigahbāñ

insāf hai ḳhush-fahmī-e-ehsās pe ḳhandāñ

har ahl-e-havas lā.eq-e-in.ām-o-karam hai

dānishvar-o-fankār sanā-ḳhvān-e-sitam hai

hubb-ul-vatanī jāfar-o-sādiq kī hai jāgīr

Tiipū kā lahū bechne vāloñ kī hai tauqīr

zanjīr-e-girāñ qismat-e-sāhib-nazarāñ hai

zahrāb-ba-kaf aaj bhī suqrāt-e-jahāñ hai

haq baat hai is daur mein taKHrib-pasandi

baatil ki sataish mein hai insan ki bulandi

taid-e-sitam shewa-e-arbab-e-hunar hai

zindan-o-rasan martaba-e-ahl-e-nazar hai

mujrim hain jo zulmat ko ujala nahin kahte

maqtal ko mohabbat ka shiwala nahin kahte

aazadi-e-afkar ki shamen na jalao

aaraish-e-zindan ke liye KHun bahao

izhaar-e-karam KHauf ke phulon se kiya jae

raushan rah-e-hasti ko bagulon se kiya jae

aain-e-chaman zulm-o-sitam ka hai nigahban

insaf hai KHush-fahmi-e-ehsas pe KHandan

har ahl-e-hawas laeq-e-inam-o-karam hai

danishwar-o-fankar sana-KHwan-e-sitam hai

hubb-ul-watani jafar-o-sadiq ki hai jagir

Tipu ka lahu bechne walon ki hai tauqir

zanjir-e-giran qismat-e-sahib-nazaran hai

zahrab-ba-kaf aaj bhi suqraat-e-jahan hai