محبت کا شوالہ

حق بات ہے اس دور میں تخریب پسندی

باطل کی ستائش میں ہے انساں کی بلندی

تائید ستم شیوۂ ارباب ہنر ہے

زندان و رسن مرتبۂ اہل نظر ہے

مجرم ہیں جو ظلمت کو اجالا نہیں کہتے

مقتل کو محبت کا شوالہ نہیں کہتے

آزادیٔ افکار کی شمعیں نہ جلاؤ

آرائش زنداں کے لئے خون بہاؤ

اظہار کرم خوف کے پھولوں سے کیا جائے

روشن رہ ہستی کو بگولوں سے کیا جائے

آئین چمن ظلم و ستم کا ہے نگہباں

انصاف ہے خوش فہمیٔ احساس پہ خنداں

ہر اہل ہوس لائق انعام و کرم ہے

دانشور و فن کار ثنا خوان ستم ہے

حب الوطنی جعفر و صادق کی ہے جاگیر

ٹیپو کا لہو بیچنے والوں کی ہے توقیر

زنجیر گراں قسمت صاحب نظراں ہے

زہراب بکف آج بھی سقراط جہاں ہے