mohabbat ke dinon mein

tū ne kab ye kahā

saath chalte hue

mere tasmoñ se dil ko nahīñ bāñdhnā

mere qadmoñ se qismat nahīñ māpnī

merī āñkhoñ se ḳhud ko nahīñ dekhnā

is shikasta jabīñ ko nahīñ chūmnā

phuul dene nahīñ

tū nahīñ jāntī

maiñ ne kitnī daf'a

tere bheje ḳhatoñ ko mukammal paḌhā

kāġhazoñ par tirī bebasī ke nishāñ maiñ ne azbar kiye

aise vā'doñ pe ḳhud ko nichhāvar kiyā

jo tire haq meñ the

tujh ko hañste samay bhī dilāse diye

aa mirī rāz-dāñ daftar-e-vasl meñ donoñ bāham mileñ

aa ke yuuñ mujh se mil

jaise yā'qūb ko koī kurtā mile

is mazāfātī laḌke ko itnā batā

kaun ḳhvāboñ ke revaḌ ko hāñke binā

tere ruḳhsār hairat se dekhā kare

aur chhue binā

koī kaise rahe

dasht meñ aab ko kaise inkār ho

ghaas ugne lagī

pārkoñ meñ paḌī ḳhālī benchoñ ke uupar

jahāñ ham mohabbat kī Dorī ko thāme

ka.ī ḳhvāb bunte fanā ho ga.e

surḳh phūloñ kī rangat badaltī rahī

tū ne qurbat kī zanjīr khīñchī nahīñ

zindagī thī ki paTrī pe chaltī rahī

tu ne kab ye kaha

sath chalte hue

mere tasmon se dil ko nahin bandhna

mere qadmon se qismat nahin mapni

meri aankhon se KHud ko nahin dekhna

is shikasta jabin ko nahin chumna

phul dene nahin

tu nahin jaanti

main ne kitni daf'a

tere bheje KHaton ko mukammal paDha

kaghazon par teri bebasi ke nishan main ne azbar kiye

aise wa'don pe KHud ko nichhawar kiya

jo tere haq mein the

tujh ko hanste samay bhi dilase diye

aa meri raaz-dan daftar-e-wasl mein donon baham milen

aa ke yun mujh se mil

jaise ya'qub ko koi kurta mile

is mazafati laDke ko itna bata

kaun KHwabon ke rewaD ko hanke bina

tere ruKHsar hairat se dekha kare

aur chhue bina

koi kaise rahe

dasht mein aab ko kaise inkar ho

ghas ugne lagi

parkon mein paDi KHali benchon ke upar

jahan hum mohabbat ki Dori ko thame

kai KHwab bunte fana ho gae

surKH phulon ki rangat badalti rahi

tu ne qurbat ki zanjir khinchi nahin

zindagi thi ki paTri pe chalti rahi