mohabbat ke is be-karan safar mein

aurat!

tere kitne ruup,

tere kitne naam

mohabbat ke is be-karāñ safar meñ

kitne paḌāv, kitne maqām

kabhī kalī, kabhī phuul

aur kabhī murjhā.ī huī pañkhuḌī

kabhī anār, kabhī māhtāb aur kabhī phuljhaḌī

taḳhlīq kā mamba.a, shaktī kā ḳhazīna terī zaat

mehvar-e-lā-mutanāhī silsila-e-hayāt-o-mamāt

shafqat, mohabbat, īsār-o-vafā sab tere ruup

sītā, sāvitrī, rādhā, miirā

sachchī chāhat ke nuqūsh

ek faqat chāhat kā atiyya, terā ye hiire kā ruup

aurat meñ ho gar ḳhud-e'timādī

dushāsan draupadī kī svāgat ko aa.e

bheroñ ḳhud sherāvālī kī iffat bachā.e

aurat hī hāsil-e-taḳhlīq-e-duniyā hai

aurat hī shu.ūr-e-ādam kā pesh-ḳhema hai

ḳhudā ne jo baḳhshā hai tujhe nasoñ kā jaal

ajab us kī qudrat hai ajab us kā kamāl

kahīñ menkā to kahīñ maryam hai tū

kahīñ aulād kī juuyā zauja-e-zakaryā hai tū

injīl o qur.ān sab tere ratab-ul-lisān

ki tū hī asl meñ hai dhartī kī shaan

mamtā karunā tere naam

ai maañ! tujhe salām

āġhosh-e-mādar ko yuuñ pahlā maktab Thahrāyā

ki tū ne hī aadam ko mohabbat karnā sikhāyā

jis ne dil meñ tere

sabhoñ kī mohabbat rakhī

usī ne qadmoñ meñ tere jannat rakhī

aql-e-ādmī aaj itnī kyuuñ hairān hai

tū hī aadmī kī pahlī pahchān hai

tere hī dam se rañg-o-bū-e-kā.enāt

az-azal tā-abad aadam kī tū hai sharīk-e-hayāt

sabhoñ kā tujh par ye e'tibār hai

shajar-e-hayāt kā tū hī barg-o-bār hai

ye duniyā bhī tujh hī se numūdār hai

girhast jīvan kā āshram hai tujh se tābinda

tū hī banī phir aadam kī najāt-dahinda

to hī jannat kī pahlī haqdār hai

saarī ibādat parastish kī hai tū rūh-e-ravāñ

ai aurat aisā terā raushan kirdār hai

mohabbat ke is be-karāñ safar meñ

tujh se hī zindagī ustuvār hai

aurat!

tere kitne rup,

tere kitne nam

mohabbat ke is be-karan safar mein

kitne paDaw, kitne maqam

kabhi kali, kabhi phul

aur kabhi murjhai hui pankhuDi

kabhi anar, kabhi mahtab aur kabhi phuljhaDi

taKHliq ka mamba, shakti ka KHazina teri zat

mehwar-e-la-mutanahi silsila-e-hayat-o-mamat

shafqat, mohabbat, isar-o-wafa sab tere rup

sita, sawitri, radha, mera

sachchi chahat ke nuqush

ek faqat chahat ka atiyya, tera ye hire ka rup

aurat mein ho gar KHud-e'timadi

dushasan draupadi ki swagat ko aae

bheron KHud sherawali ki iffat bachae

aurat hi hasil-e-taKHliq-e-duniya hai

aurat hi shuur-e-adam ka pesh-KHema hai

KHuda ne jo baKHsha hai tujhe nason ka jal

ajab us ki qudrat hai ajab us ka kamal

kahin meinka to kahin maryam hai tu

kahin aulad ki juya zauja-e-zakarya hai tu

injil o quran sab tere ratab-ul-lisan

ki tu hi asl mein hai dharti ki shan

mamta karuna tere nam

ai man! tujhe salam

aaghosh-e-madar ko yun pahla maktab Thahraya

ki tu ne hi aadam ko mohabbat karna sikhaya

jis ne dil mein tere

sabhon ki mohabbat rakhi

usi ne qadmon mein tere jannat rakhi

aql-e-admi aaj itni kyun hairan hai

tu hi aadmi ki pahli pahchan hai

tere hi dam se rang-o-bu-e-kaenat

az-azal ta-abad aadam ki tu hai sharik-e-hayat

sabhon ka tujh par ye e'tibar hai

shajar-e-hayat ka tu hi barg-o-bar hai

ye duniya bhi tujh hi se numudar hai

girhast jiwan ka aashram hai tujh se tabinda

tu hi bani phir aadam ki najat-dahinda

to hi jannat ki pahli haqdar hai

sari ibaadat parastish ki hai tu ruh-e-rawan

ai aurat aisa tera raushan kirdar hai

mohabbat ke is be-karan safar mein

tujh se hi zindagi ustuwar hai