mohabbat ke siwa kuchh bhi nahin

terī duniyā meñ to nafrat kā jahāñ bastā hai

merī duniyā meñ mohabbat ke sivā kuchh bhī nahīñ

tere dil ko to hazāroñ kī lagan rahtī hai

mere dil meñ tirī hasrat ke sivā kuchh bhī nahīñ

terī aadat meñ adāvat kī farāvānī hai

merī aadat meñ muravvat ke sivā kuchh bhī nahīñ

tere aalam meñ taḳhayyul hai hasīñ bātoñ kā

mere aalam meñ to hairat ke sivā kuchh bhī nahīñ

husn meñ tere hai ik nuur kī duniyā raqsāñ

aur mire ishq meñ zulmat ke sivā kuchh bhī nahīñ

terī qismat meñ haiñ tahrīr tarab-gūñ lamhe

merī qismat meñ musībat ke sivā kuchh bhī nahīñ

terī fitrat to hai bātoñ se batānā dil kā

merī fitrat meñ sadāqat ke sivā kuchh bhī nahīñ

sach hai 'afzal' ko tire ishq ne barbād kiyā

martaba is kā bhī thā varna buland-o-bālā

teri duniya mein to nafrat ka jahan basta hai

meri duniya mein mohabbat ke siwa kuchh bhi nahin

tere dil ko to hazaron ki lagan rahti hai

mere dil mein teri hasrat ke siwa kuchh bhi nahin

teri aadat mein adawat ki farawani hai

meri aadat mein murawwat ke siwa kuchh bhi nahin

tere aalam mein taKHayyul hai hasin baaton ka

mere aalam mein to hairat ke siwa kuchh bhi nahin

husn mein tere hai ek nur ki duniya raqsan

aur mere ishq mein zulmat ke siwa kuchh bhi nahin

teri qismat mein hain tahrir tarab-gun lamhe

meri qismat mein musibat ke siwa kuchh bhi nahin

teri fitrat to hai baaton se batana dil ka

meri fitrat mein sadaqat ke siwa kuchh bhi nahin

sach hai 'afzal' ko tere ishq ne barbaad kiya

martaba is ka bhi tha warna buland-o-baala