mohabbat ke tasawwur mein

ye sach hai maiñ ne chāhā thā

ki merī zindagī meñ ishq ban kar jab bhī tū aa.e

to yuuñ aa.e

ke jaise maut aatī hai

thakī haarī sī sāñsoñ ko sukūñ kī thapkiyāñ dene

badan ko ruuh ko yuuñ bhīñch kar āġhosh meñ lene

ki phir sab us kā ho jaa.e

na kuchh bhī chhūTne paa.e

ke us āġhosh se apnī

na phir koī rihā.ī ho

kisī kī jaan lenā bhī magar ik art hai yuuñ

to siine se tū Takrāyā

magar aage na baḌh paayā

tire āġhosh meñ jānāñ baḌī hī be-qarārī thī

ghuTan siine meñ sāñseñ zard ik dahshat sī taarī thī

go maiñ ne bārhā ḳhud ko ye samjhāyā

ke ye ek faiz hī hai bas

guzar jā.egā haule se

phir ik vo lamha aa.egā

ki jab ye zindagī merī sukūñ meñ Duub jā.egī

magar ye ho nahīñ paayā

vo ik lamha nahīñ aayā

to ab aalam kuchh aisā hai

ye sāñseñ ukhḌī ukhḌī haiñ

paḌā hai zehn bhī ḳhāmosh

āñkheñ sūkhī sūkhī haiñ

magar sab se ziyāda jo mujhe afsos hai vo ye

ki jaañ maiñ ab bhī zinda huuñ

aur ab ye zindagī pahle se baḌh kar be-ma.ānī hai

tū merī zindagī meñ ḳhud-kushī kā pal thā jān-e-jāñ

jo puurā ho nahīñ paayā

jo puurā ho nahīñ paayā

ye sach hai main ne chaha tha

ki meri zindagi mein ishq ban kar jab bhi tu aae

to yun aae

ke jaise maut aati hai

thaki haari si sanson ko sukun ki thapkiyan dene

badan ko ruh ko yun bhinch kar aaghosh mein lene

ki phir sab us ka ho jae

na kuchh bhi chhuTne pae

ke us aaghosh se apni

na phir koi rihai ho

kisi ki jaan lena bhi magar ek art hai yun

to sine se tu Takraya

magar aage na baDh paya

tere aaghosh mein jaanan baDi hi be-qarari thi

ghuTan sine mein sansen zard ek dahshat si tari thi

go main ne barha KHud ko ye samjhaya

ke ye ek faiz hi hai bas

guzar jaega haule se

phir ek wo lamha aaega

ki jab ye zindagi meri sukun mein Dub jaegi

magar ye ho nahin paya

wo ek lamha nahin aaya

to ab aalam kuchh aisa hai

ye sansen ukhDi ukhDi hain

paDa hai zehn bhi KHamosh

aankhen sukhi sukhi hain

magar sab se ziyaada jo mujhe afsos hai wo ye

ki jaan main ab bhi zinda hun

aur ab ye zindagi pahle se baDh kar be-maani hai

tu meri zindagi mein KHud-kushi ka pal tha jaan-e-jaan

jo pura ho nahin paya

jo pura ho nahin paya