mohabbat

ḳhudā kā ik atiyya hai ḳhudā kī ek ne.amat hai

garāñ-māya ye tohfa hai mohabbat ek daulat hai

mohabbat nūr-e-yazdāñ hai mohabbat zill-e-sub.hānī

mohabbat jām-e-irfāñ hai mohabbat kaif-e-īmānī

mohabbat āb-e-haivāñ hai mohabbat abr-e-nīsānī

sarāsar ye sa.ādat hai sarāpā ek rahmat hai

mohabbat ek tohfa hai mohabbat ek daulat hai

mohabbat bā.is-e-imkāñ mohabbat jān-e-ālam hai

mohabbat zevar-e-insāñ mohabbat husn-e-ādam hai

mohabbat āya-e-rahmāñ mohabbat ism-e-āzam hai

nizām-e-zindagī qaa.em mohabbat kī badaulat hai

mohabbat ek tohfa hai mohabbat ek daulat hai

mohabbat paak jazba hai mohabbat zauq-e-kāmil hai

matā-e-zindagī hai aur yahī duniyā kā hāsil hai

agar duniyā samundar hai mohabbat us kā sāhil hai

isī kā naam rāhat hai isī kā naam ishrat hai

mohabbat ek tohfa ek daulat hai

mohabbat jārī-o-sārī zamīñ se āsmāñ tak hai

isī kī kār-farmā.ī makāñ se lā-makāñ tak hai

mohabbat hai vahāñ tak fikr-e-insānī jahāñ tak hai

muhīt-e-vus.at-e-getī mohabbat hai mohabbat hai

mohabbat ek tohfa hai mohabbat ek daulat hai

mohabbat hī se ye duniyā hasīñ ma.alūm hotī hai

baḌī dilkash balā kī dil-nashīñ ma.alūm hotī hai

nazar meñ phir yahī ḳhuld-e-barīñ ma.alūm hotī hai

mohabbat ek doshīza kī tarah ḳhūbsūrat hai

mohabbat ek tohfa hai mohabbat ek daulat hai

mohabbat jis meñ hotī hai vo dil bedār rahtā hai

mohabbat ke nashe se har ghaḌī sarshār rahtā hai

vahī dil-shād duniyā meñ bas ai 'muḳhtār' rahtā hai

bashar ke vāste ye to bahut hī besh-qīmat hai

mohabbat ek tohfa hai mohabbat ek daulat hai

KHuda ka ek atiyya hai KHuda ki ek neamat hai

garan-maya ye tohfa hai mohabbat ek daulat hai

mohabbat nur-e-yazdan hai mohabbat zill-e-subhani

mohabbat jam-e-irfan hai mohabbat kaif-e-imani

mohabbat aab-e-haiwan hai mohabbat abr-e-nisani

sarasar ye saadat hai sarapa ek rahmat hai

mohabbat ek tohfa hai mohabbat ek daulat hai

mohabbat bais-e-imkan mohabbat jaan-e-alam hai

mohabbat zewar-e-insan mohabbat husn-e-adam hai

mohabbat aaya-e-rahman mohabbat ism-e-azam hai

nizam-e-zindagi qaem mohabbat ki badaulat hai

mohabbat ek tohfa hai mohabbat ek daulat hai

mohabbat pak jazba hai mohabbat zauq-e-kaamil hai

mata-e-zindagi hai aur yahi duniya ka hasil hai

agar duniya samundar hai mohabbat us ka sahil hai

isi ka nam rahat hai isi ka nam ishrat hai

mohabbat ek tohfa ek daulat hai

mohabbat jari-o-sari zamin se aasman tak hai

isi ki kar-farmai makan se la-makan tak hai

mohabbat hai wahan tak fikr-e-insani jahan tak hai

muhit-e-wusat-e-geti mohabbat hai mohabbat hai

mohabbat ek tohfa hai mohabbat ek daulat hai

mohabbat hi se ye duniya hasin malum hoti hai

baDi dilkash bala ki dil-nashin malum hoti hai

nazar mein phir yahi KHuld-e-barin malum hoti hai

mohabbat ek doshiza ki tarah KHubsurat hai

mohabbat ek tohfa hai mohabbat ek daulat hai

mohabbat jis mein hoti hai wo dil bedar rahta hai

mohabbat ke nashe se har ghaDi sarshaar rahta hai

wahi dil-shad duniya mein bas ai 'muKHtar' rahta hai

bashar ke waste ye to bahut hi besh-qimat hai

mohabbat ek tohfa hai mohabbat ek daulat hai