mohabbat ki baat

chalo mohabbat kī baat kareñ

ab

maile jismoñ se uupar uTh kar

bhūlte hue ki kabhī

ghuTne Tek chuke haiñ ham

aur dekh chuke haiñ

apnī ruuh ko taar taar hote

jhūTe faḳhr ke saath

chalo mohabbat kī baat kareñ

zindagī ke pairoñ tale

be-rahmī se rauñde jaane ke ba.ad

marham lagā.eñ zaḳhmī vajūd par

jo sharm se āñkheñ jhukā kar

baiThā hai sapnoñ ke mazār pe

is se burī koī baat nahīñ kar sakte

ham apnī hī zid meñ

dhokā de chuke haiñ apne-āp ko

khel chuke haiñ ḳhud apnī izzat se

bhog chuke haiñ jhuuT ko sach kī tarah

ab

in hālāt meñ

koī ġhair-zarūrī baat hī kar sakte haiñ ham

aao mohabbat kī baat kareñ

chalo mohabbat ki baat karen

ab

maile jismon se upar uTh kar

bhulte hue ki kabhi

ghuTne Tek chuke hain hum

aur dekh chuke hain

apni ruh ko tar tar hote

jhuTe faKHr ke sath

chalo mohabbat ki baat karen

zindagi ke pairon tale

be-rahmi se raunde jaane ke baad

marham lagaen zaKHmi wajud par

jo sharm se aankhen jhuka kar

baiTha hai sapnon ke mazar pe

is se buri koi baat nahin kar sakte

hum apni hi zid mein

dhoka de chuke hain apne-ap ko

khel chuke hain KHud apni izzat se

bhog chuke hain jhuT ko sach ki tarah

ab

in haalat mein

koi ghair-zaruri baat hi kar sakte hain hum

aao mohabbat ki baat karen