mohabbat

mohabbat jis meñ laġhzish bhī husūl-e-kāmrānī hai

mohabbat jis kī har kāvish surūr-e-jāvedānī hai

mohabbat jis meñ ġham bhī intihā-e-shādmānī hai

mohabbat jis kī tafsīr-o-vazāhat be-zabānī hai

mohabbat jis meñ rūposhī bhī ik iz.hār ho jaa.e

mohabbat jis meñ ḳhāmoshī lab-e-guftār ho jaa.e

mohabbat jis kī ātish meñ baqā paate haiñ parvāne

mohabbat jis kī ābādī meñ haiñ ābād mastāne

mohabbat jis kī vus.at ko nizām-e-hosh kyā jaane

mohabbat jis ko afsāna banā rakkhā hai duniyā ne

mohabbat ibtidā kahte haiñ lafz-e-vāh se jis kī

mohabbat intihā sunte haiñ lafz-e-āh se jis kī

mohabbat jis kī ra.anā.ī guloñ meñ muskurātī hai

mohabbat jo nazar ko jalva-e-fitrat dikhātī hai

mohabbat jo kamāl-e-husn ko yaktā banātī hai

mohabbat jis meñ ġham-āgīñ tamanna chain paatī hai

mohabbat jis pe qaa.em imbisāt-e-ġhair-fānī hai

mohabbat jis se vābasta nashāt-e-jāvedānī hai

mohabbat jis ko bahr-e-zindagī kā nāḳhudā kahiye

mohabbat jis ko aalam meñ fanā-nā-āshnā kahiye

mohabbat jis ko fānūs-e-masarrat kī ziyā kahiye

mohabbat jis ko lafz-e-ām meñ lutf-e-vafā kahiye

mohabbat jo bashar ke saath miTtī hai na martī hai

mohabbat ruuh meñ jo arsh-e-a.azam se utartī hai

mohabbat jo kabhī ġham hai kabhī āzād hasrat hai

mohabbat jo kabhī sarmāya-e-kaif-e-masarrat hai

mohabbat jis kī mushkil ik hayāt-afroz lazzat hai

mohabbat jis kā har andāz jaadū hai karāmat hai

vo jazba hai jo ā.īn-e-ḳhirad se duur rahtā hai

ye ehsās-e-muqaddas qalb meñ mastūr rahtā hai

mohabbat jis mein laghzish bhi husul-e-kaamrani hai

mohabbat jis ki har kawish surur-e-jawedani hai

mohabbat jis mein gham bhi intiha-e-shadmani hai

mohabbat jis ki tafsir-o-wazahat be-zabani hai

mohabbat jis mein ruposhi bhi ek izhaar ho jae

mohabbat jis mein KHamoshi lab-e-guftar ho jae

mohabbat jis ki aatish mein baqa pate hain parwane

mohabbat jis ki aabaadi mein hain aabaad mastane

mohabbat jis ki wusat ko nizam-e-hosh kya jaane

mohabbat jis ko afsana bana rakkha hai duniya ne

mohabbat ibtida kahte hain lafz-e-wah se jis ki

mohabbat intiha sunte hain lafz-e-ah se jis ki

mohabbat jis ki ranai gulon mein muskuraati hai

mohabbat jo nazar ko jalwa-e-fitrat dikhati hai

mohabbat jo kamal-e-husn ko yakta banati hai

mohabbat jis mein gham-agin tamanna chain pati hai

mohabbat jis pe qaem imbisat-e-ghair-fani hai

mohabbat jis se wabasta nashat-e-jawedani hai

mohabbat jis ko bahr-e-zindagi ka naKHuda kahiye

mohabbat jis ko aalam mein fana-na-ashna kahiye

mohabbat jis ko fanus-e-masarrat ki ziya kahiye

mohabbat jis ko lafz-e-am mein lutf-e-wafa kahiye

mohabbat jo bashar ke sath miTti hai na marti hai

mohabbat ruh mein jo arsh-e-azam se utarti hai

mohabbat jo kabhi gham hai kabhi aazad hasrat hai

mohabbat jo kabhi sarmaya-e-kaif-e-masarrat hai

mohabbat jis ki mushkil ek hayat-afroz lazzat hai

mohabbat jis ka har andaz jadu hai karamat hai

wo jazba hai jo aain-e-KHirad se dur rahta hai

ye ehsas-e-muqaddas qalb mein mastur rahta hai