mohabbat

na is kā pujārī na us kā namāzī

nazar us kī hotī nahīñ imtiyāzī

faqat ek maqsad faqat ek bāġhī

shahīd-e-mohabbat na kāfir na ġhāzī

mohabbat kī rasmeñ na turkī na taazī

ġham-e-jāvedāñ hai ġham-e-avvalīñ hai

ye fahm-o-farāsat se bālā-tarīñ hai

ajab is kī duniyā ajab is kā diiñ hai

vo kuchh aur shai hai mohabbat nahīñ hai

sikhātī hai jo ġhaznavī ko ayāzī

yahī lā.eq-e-kalma-e-āfrīñ hai

ye īmān-e-kāmil mukammal yaqīñ hai

agarche azal se yahī dil-nashīñ hai

ye jauhar agar kār-farmā nahīñ hai

to haiñ ilm-o-hikmat faqat shīsha-bāzī

na is samt shashdar na us samt hairān

na is se pareshāñ na us se pashemāñ

na mauqūf-e-sahrā na vaqf-e-gulistāñ

na muhtāj-e-sultāñ na mar.ūb-e-sultāñ

mohabbat hai āzādī-o-be-niyāzī

na ehsās mānūs jāma-darī se

na idrāk mansūb jādūgarī se

mirā ġham hai baalā ġham-e-hamsarī se

mirā faqr behtar hai askandarī se

ye ādam-garī hai vo ā.īna-sāzī

na is ka pujari na us ka namazi

nazar us ki hoti nahin imtiyazi

faqat ek maqsad faqat ek baghi

shahid-e-mohabbat na kafir na ghazi

mohabbat ki rasmen na turki na tazi

gham-e-jawedan hai gham-e-awwalin hai

ye fahm-o-farasat se baala-tarin hai

ajab is ki duniya ajab is ka din hai

wo kuchh aur shai hai mohabbat nahin hai

sikhati hai jo ghaznawi ko ayazi

yahi laeq-e-kalma-e-afrin hai

ye iman-e-kaamil mukammal yaqin hai

agarche azal se yahi dil-nashin hai

ye jauhar agar kar-farma nahin hai

to hain ilm-o-hikmat faqat shisha-bazi

na is samt shashdar na us samt hairan

na is se pareshan na us se pasheman

na mauquf-e-sahra na waqf-e-gulistan

na muhtaj-e-sultan na marub-e-sultan

mohabbat hai aazadi-o-be-niyazi

na ehsas manus jama-dari se

na idrak mansub jadugari se

mera gham hai baala gham-e-hamsari se

mera faqr behtar hai askandari se

ye aadam-gari hai wo aaina-sazi