محبت

نہ اس کا پجاری نہ اس کا نمازی

نظر اس کی ہوتی نہیں امتیازی

فقط ایک مقصد فقط ایک باغی

شہید محبت نہ کافر نہ غازی

محبت کی رسمیں نہ ترکی نہ تازی

غم جاوداں ہے غم اولیں ہے

یہ فہم و فراست سے بالا تریں ہے

عجب اس کی دنیا عجب اس کا دیں ہے

وہ کچھ اور شے ہے محبت نہیں ہے

سکھاتی ہے جو غزنوی کو ایازی

یہی لائق کلمۂ آفریں ہے

یہ ایمان کامل مکمل یقیں ہے

اگرچہ ازل سے یہی دل نشیں ہے

یہ جوہر اگر کار فرما نہیں ہے

تو ہیں علم و حکمت فقط شیشہ بازی

نہ اس سمت ششدر نہ اس سمت حیران

نہ اس سے پریشاں نہ اس سے پشیماں

نہ موقوف صحرا نہ وقف گلستاں

نہ محتاج سلطاں نہ مرعوب سلطاں

محبت ہے آزادی و بے نیازی

نہ احساس مانوس جامہ دری سے

نہ ادراک منسوب جادوگری سے

مرا غم ہے بالا غم ہمسری سے

مرا فقر بہتر ہے اسکندری سے

یہ آدم گری ہے وہ آئینہ سازی