mohabbat

nazar ke tiir se ik dard sā uThtā hai siine meñ

phir is ke baa'd se hī sab kā jī lagtā hai jiine meñ

ye aisā dard hai jo din-ba-din baḌhtā hī jaatā hai

chaḌhe dariyā mohabbat kā to bas chaḌhtā hī jaatā hai

mohabbat jis meñ rahtī hai vo man mailā nahīñ hotā

ki jaise chāñdnī chhū le to tan mailā nahīñ hotā

isī ḳhushbū ko le ke raat kī raanī mahaktī hai

mohabbat chuum le jis ko vo peshānī mahaktī hai

ye hindū hai na muslim hai mohabbat sikh na īsā.ī

jidhar se jab bhī ye guzrī to har ghar meñ bahār aa.ī

jahāñ meñ sab se ūñchā ik mohabbat kā shivāla hai

jahāñ dekho jidhar dekho usī kā bol-bālā hai

mohabbat kā ye pahlū bhī zarā sā ġhaur farmā.eñ

agar unvān achchhā ho to ham kuchh aur farmā.eñ

mohabbat hai mubārakbād ke laa.eq to āḳhir kyoñ

jo sachchī baat hai us ko zabāñ kahne se qāsir kyoñ

magar ye baat bhī mahbūb ke lahje meñ bhātī hai

mujhe tum se mohabbat hai ye kahte sharm aatī hai

'suman' is dard ko in.ām-e-yazdānī samajhtī hai

aur is ehsās ko ehsās-e-lā-sānī samajhtī hai

nazar ke tir se ek dard sa uThta hai sine mein

phir is ke ba'd se hi sab ka ji lagta hai jine mein

ye aisa dard hai jo din-ba-din baDhta hi jata hai

chaDhe dariya mohabbat ka to bas chaDhta hi jata hai

mohabbat jis mein rahti hai wo man maila nahin hota

ki jaise chandni chhu le to tan maila nahin hota

isi KHushbu ko le ke raat ki rani mahakti hai

mohabbat chum le jis ko wo peshani mahakti hai

ye hindu hai na muslim hai mohabbat sikh na isai

jidhar se jab bhi ye guzri to har ghar mein bahaar aai

jahan mein sab se uncha ek mohabbat ka shiwala hai

jahan dekho jidhar dekho usi ka bol-baala hai

mohabbat ka ye pahlu bhi zara sa ghaur farmaen

agar unwan achchha ho to hum kuchh aur farmaen

mohabbat hai mubarakbaad ke laeq to aaKHir kyon

jo sachchi baat hai us ko zaban kahne se qasir kyon

magar ye baat bhi mahbub ke lahje mein bhati hai

mujhe tum se mohabbat hai ye kahte sharm aati hai

'suman' is dard ko inam-e-yazdani samajhti hai

aur is ehsas ko ehsas-e-la-sani samajhti hai