mohabbat par yaqin tha jab

maiñ zinda huuñ

tavānā.ī

mirī rag rag meñ bahtī hai

maiñ jab chāhūñ

zarā sā haath uThā kar āsmāñ chhū luuñ

fazā meñ tairtī jā.ūñ

sabā har sub.h dilkash raqs kartī hai mirī ḳhātir

shafaq har shaam sajtī hai ki maiñ us par nazar Dālūñ

sitāre aañkh rakhte haiñ mire abrū kī jumbish par

ishāra ho to sab ke sab mire āñchal pe aa jaa.eñ

maiñ sargoshī karūñ to zindagī mas.hūr ho jaa.e

zarā nazreñ uThā.ūñ vaqt kī raftār tham jaa.e

maiñ hañstī huuñ

harī shāḳhoñ pe khilte surḳh phūloñ meñ

mire aañsū

sunahrī tashtarī meñ pesh hote haiñ

ḳhudā.ī bārgāhoñ meñ

huzūrī kā sharaf miltā hai merī sab duāoñ ko

kabhī

mahsūs hotā thā

main zinda hun

tawanai

meri rag rag mein bahti hai

main jab chahun

zara sa hath uTha kar aasman chhu lun

faza mein tairti jaun

saba har subh dilkash raqs karti hai meri KHatir

shafaq har sham sajti hai ki main us par nazar Dalun

sitare aankh rakhte hain mere abru ki jumbish par

ishaara ho to sab ke sab mere aanchal pe aa jaen

main sargoshi karun to zindagi mashur ho jae

zara nazren uThaun waqt ki raftar tham jae

main hansti hun

hari shaKHon pe khilte surKH phulon mein

mere aansu

sunahri tashtari mein pesh hote hain

KHudai bargahon mein

huzuri ka sharaf milta hai meri sab duaon ko

kabhi

mahsus hota tha