mohabbat

tumheñ july kī unnīsvīñ taptī jhulastī dopahar ab yaad kab hogī

ki jis kī hiddateñ kitne mahīnoñ ba.ad tak

ham ne badan ke har darīche par likhī mahsūs kī thiiñ

aur unheñ nazmeñ samajh kar gungunāyā thā

tumhāre jism kī pagDanDiyoñ par chalte chalte ek aisā moḌ aayā thā

jahāñ auhām ilhāmī nazar aate haiñ

aur imkān nākāmī mohabbat zabt āvāzeñ samundar dard ban jaate haiñ

saare ḳhvāb palkoñ kī harī shāḳhoñ se jhūle lene lagte haiñ

simaT aate haiñ saare hijr āñkhoñ meñ

vahīñ us moḌ par pahlī dafa maiñ ne ye samjhā

ruuh mādda hai

ki is kī ik kamīyyat hai hajm hai bojh rakhtī hai

aur us kā bhī badan hotā hai

jis meñ nanhe nanhe ā.īne yāqūt ke mānind bante aur bigaḌte haiñ

tumheñ kab yaad hogā

TūTte kamzor lamhoñ ke ye bandhan kis qadar mazbūt hote haiñ

ki ab maiñ har baras july kī unnīsvīñ taptī jhulastī dopahar meñ

ḳhvāb jugnū aur sitāre apnī āñkhoñ par rakhe mahsūs kartā huuñ

tumheñ chhūtā huuñ palkoñ se

havā meñ uñgliyāñ bhar kar

tumhāre kaan se sargoshiyāñ karte hue bāloñ ko

ik tamhīd detā huuñ

nigāh-e-ḳhvāb-ālūda ke bosoñ se

tumhāre jism kī saarī safoñ par lafz rakhtā huuñ

tumheñ bhartā huuñ bāñhoñ meñ

tumhārī yād-e-rafta se vahī lamha uThā kar vaqt ko sākit banātā huuñ

to phir vo moḌ aatā hai

jahāñ auhām ilhāmī nazar aate haiñ

aur ik nazm kī taḳhlīq hotī hai

tumhein july ki unniswin tapti jhulasti dopahar ab yaad kab hogi

ki jis ki hiddaten kitne mahinon baad tak

hum ne badan ke har dariche par likhi mahsus ki thin

aur unhen nazmen samajh kar gungunaya tha

tumhaare jism ki pagDanDiyon par chalte chalte ek aisa moD aaya tha

jahan auham ilhami nazar aate hain

aur imkan nakaami mohabbat zabt aawazen samundar dard ban jate hain

sare KHwab palkon ki hari shaKHon se jhule lene lagte hain

simaT aate hain sare hijr aankhon mein

wahin us moD par pahli dafa main ne ye samjha

ruh madda hai

ki is ki ek kamiyyat hai hajm hai bojh rakhti hai

aur us ka bhi badan hota hai

jis mein nanhe nanhe aaine yaqut ke manind bante aur bigaDte hain

tumhein kab yaad hoga

TuTte kamzor lamhon ke ye bandhan kis qadar mazbut hote hain

ki ab main har baras july ki unniswin tapti jhulasti dopahar mein

KHwab jugnu aur sitare apni aankhon par rakhe mahsus karta hun

tumhein chhuta hun palkon se

hawa mein ungliyan bhar kar

tumhaare kan se sargoshiyan karte hue baalon ko

ek tamhid deta hun

nigah-e-KHwab-aluda ke boson se

tumhaare jism ki sari safon par lafz rakhta hun

tumhein bharta hun banhon mein

tumhaari yaad-e-rafta se wahi lamha uTha kar waqt ko sakit banata hun

to phir wo moD aata hai

jahan auham ilhami nazar aate hain

aur ek nazm ki taKHliq hoti hai